Almatyda monshada esinen tanyp, ystyq peshke qulaǵan er adam aman qaldy
ALMATY. QazAqparat - Almatydaǵy №4 qalalyq aýrýhanasynyń kombýstıologtary monshadaǵy ystyq peshke qulaǵan er adamnyń ómiri úshin 77 kún kúresti. Naýqastyń denesin 50 paıyz tereń kúıik shalǵan, dep habarlaıdy QazAqparat tilshisi.
«Naýqas óte aýyr jaǵdaıda tústi, sondyqtan birden jansaqtaý jáne qarqyndy terapııanyń anestezıologııa bólimine jatqyzyldy. Jansaqtaý bóliminde kúıikke qarsy «Redaktron» tósegimen jabdyqtalǵan mamandandyrylǵan palata bar. Naýqas úshin jeke post qoıyldy, biz qoldan kelgenniń bárin istedik», - deıdi №4 qalalyq klınıkalyq aýrýhananyń jansaqtaý bóliminiń meńgerýshisi Jandos Dáýletbekov.
Aıtýynsha, naýqas jansaqtaý bóliminde 41 kún jatty, jaǵdaıy turaqtanǵannan keıin aýrýhananyń kúıik bólimshesine aýystyryldy.
«Oǵan birikken jaraqat. Deneniń oń jaǵynyń S=50%(30%)/I-II-IIIa-IIIb-IV dárejeli termııalyq kúıigi dıagnozy qoıyldy. Bir mezgilde aýtodermoplastıkamen 5 nekrektomııa operatsııasy jasaldy - teri aýystyryldy. Mine, 77-shi kúni naýqastyń jaǵdaıy jaqsaryp, ony qanaǵattanarlyq kúıde úıine shyǵaryp jatyrmyz», - deıdi №4 qalalyq klınıkalyq aýrýhananyń kúıik aýrýlary bólimshesiniń meńgerýshisi Eldos Álmenov.
Dárigerdiń sózinshe, Grıgorııdiń es-tússiz kúıde qyzyp turǵan peshte qansha ýaqyt jatqany belgisiz.
«19 sáýirde men aýyr kúıikpen jansaqtaý bólimine tústim, bir aıaǵym kórde boldy. 40 kún jansaqtaý bóliminde jatyp, keıin bólimshege aýystyryldym, meniń ómirim úshin kóp adam kúresti - olarǵa alǵysym sheksiz, olardyń arqasynda men búgin tirimin. Kúni boıy qasymda kezekshilikte bolǵan dárigerlege, medbıkelerge rahmet. Osy kisilerdiń arqasynda óz aıaǵymmen úıge qaıtyp baramyn. Sezimimdi sózben aıtyp jetkize almaımyn», – deıdi almatylyq Grıgorıı Losetskıı.
