Almatyda monshada esinen tanyp, qatty kúıik shalǵan zeınetker aman qaldy
ALMATY. QazAqparat - Almaty dárigerleri zeınetkerdiń ómirin ajaldan arashalap qaldy, dep habarlaıdy QazAqparat tilshisi.
67 jastaǵy Qurbanjan Ismaılov monshada esinen tanyp, bir saǵatqa jýyq ýaqyt ystyq peshtiń ústinde jatyp qalǵan. Osylaısha zeınetkerdiń oń jaq denesin aýyr kúıik shalǵan.
Japa shekken qarııa shuǵyl №4 aýrýhanaǵa jetkizildi. Onyń ómiri qyl ústinde turǵan.
«Er adam aýyr halde tústi. Oń jaq ıyǵyn, denesin tórtinshi dárejeli kúıik shalǵan, oń jaq qoly istemeı qalǵan. Dárigerler oń qolyn kesip tastaý jóninde sheshim qabyldaǵan. Ota kezinde patsıenttiń oń jaq jaýyrynynyń jartysy kúıgeni anyqtaldy. Jaýyrynnyń jartysyn rezektsııa jasaıtyn boldyq. Ystyqtan oń jaq qabyrǵalarynyń bulshyqetteri jalań qalǵan. Dárigerler birneshe ret teri aýystyrdy», - dedi aýrýhananyń kúıik bóliminiń meńgerýshisi Nurjan Bıkonýrov.
Naýqastyń densaýlyǵyn jaqsartý úshin dárigerler 1,5 aı eńbek etti.
Qazir onyń terisi tolyq qalpyna keldi. Erteń naýqas aýrýhanadan shyǵady.
«Bir aı buryn osy peshtiń ústinde kúıip qalǵanmyn. Býǵa kúıgen eshteńe emes, ystyq metalǵa jabysyp qalǵan sumdyq eken. Búginde meniń jaǵdaıym jaqsy. Dárigerlerge alǵysym sheksiz. Olar meni ana dúnıeden alyp shyqty desem, artyq bolmas», - deıdi Qurbanjan Ismaılov.
