Almatyda monıtorıngtik top anyqtaǵan merekelik sharaǵa blogerler men ártister qatysqan

ALMATY. QazAqparat – Almaty monıtorıng toby «Royal Tulip» qonaqúı kesheni aýmaǵyndaǵy «Black star burger» meıramhanalar jelisi ókilderiniń karantındi buzǵanyn anyqtady, dep habarlaıdy QazAqparat tilshisi.

«Medeý aýdanynyń monıtorıng toby 8 tamyzda «Royal Tulip» qonaqúı kesheniniń aýmaǵynda karantın talaptarynyń buzylǵanyn anyqtady. Onda «Black star burger» ókilderi merekelik shara ótkizgen. Qonaqúı kesheni men «Black star burger» ókilderinen túsinikteme alyndy. Materıaldar aýdandyq sanıtarlyq-epıdemıologııalyq baqylaý basqarmasyna berildi», - dep habarlady Medeý aýdandyq ákimdiginen.

Almaty qalalyq sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylov monıtorıng tobynyń materıaldary boıynsha jaýapty tulǵalar ákimshilik jaýapqa tartylatynyn atap ótti.

Kompanııanyń Instagram paraqshasynan bul is-sharaǵa Qazaqstannyń tanymal blogerleri men ártisteri jınalǵanyn kórýge bolady.

Eske salaıyq, Almaty koronavırýstan «qoıý qyzyl» aımaqta. Bas sandárigerdiń qaýlysyna sáıkes, qalada kópshilik jınalatyn sharalar ótkizýge tyıym salynǵan.

Avtory: Elaman Turysbekov