Almatyda monıtorıng toby «qyz uzatý» toıyn toqtatty

ALMATY. QazAqparat - Almatyda monıtorıng toby qyz uzatý toıyn toqtatty. Ákimdik turǵyndardy karantın sharalaryn saqtaýǵa shaqyrdy, dep habarlaıdy QazAqparat tilshisi.

Epıdemııa bastalǵaly KVI juqtyrýdyń 53 myńan astam jaǵdaıy tirkeldi (100 myń turǵynǵa shaqqandaǵy kórsetkish - 2715,7), onyń ishinde 2021 jyldyń basynan bastap 29 sáýirdi qosa alǵanda 35 995 jaǵdaı (100 myń turǵynǵa shaqqandaǵy kórsetkish 1781,1), jalpy 2020 jyly 18521 tirkelgen jaǵdaıda (100 myń turǵynǵa shaqqandaǵy kórsetkish 927,7), ıaǵnı ótken jylǵy syrqattaný deńgeıinen 2 esege artqany baıqalady.

Ótken táýlikte 697 adamnan koronavırýs anyqtaldy.

Qoǵamdyq tamaqtaný oryndarynda juqtyrý 0,8% - ǵa ósti. 20-39 jas aralyǵyndaǵy jastar arasynda KVI aýrýynyń eń joǵary deńgeıi – 35,5%, 60 jastan asqan azamattar arasynda - 22,5%, jasóspirimder arasynda syrqattaný 0,3% - ǵa - 3,0-dan 3,3% - ǵa deıin ulǵaıý jalǵasýda.

Almaty ákimdigi megapolıs turǵyndaryn adam kóp jınalatyn oryndarǵa, jabyq keshterge, banketterge, úılený toılaryna barmaýǵa jáne juqtyrý qaýpi joǵary is-sharalarǵa qatyspaýǵa shaqyrady.

Almatyda juqtyrý jaǵdaılaryn tirkeýdiń jalǵasýyna baılanysty karantın shekteýlerdi buzýshylyqtardy anyqtaý jáne olarǵa jol bermeý jónindegi monıtorıng tobynyń jumysy kúsheıtilgen rejımge aýystyryldy.

Bıylǵy jyldyń 20 naýryzynan 30 sáýirine deıin barlyǵy 727 buzýshylyq anyqtaldy. Anyqtalǵan nysandardyń jalpy sanynan – 498-i meıramhana, dámhana jáne dúkenderge, 94-i kompıýterlik klýbqa, 15-i bılıard klýbyna, 43-i SPA salonǵa, 27-si saýnaǵa, 2-ýi kalıan baryna, 24-i karaoke klýbyna, 10-y loto klýbqa, 1-ýi býkmekerlik keńsege, 15-i túngi klýbqa jatady. Aýdandyq polıtsııa basqar malaryna barlyǵy 3304 adam jetkizildi.

Mysaly, 29 sáýirde keshki saǵat jetiler shamasynda Almaly aýdanynyń monıtorıng toby «Caffe Del Teatro» mekemesinde karantın talaptarynyń buzylǵanyn anyqtady. Banket zalynda uzatýǵa jınalǵandar boldy. Toıdyń ótýine jol berilmedi.

«Caffe Del Teatro» kafesiniń ıesine qatysty ákimshilik hattama toltyrylyp, toı qonaqtaryna sanıtarlyq-epıdemıologııalyq normalardy saqtaý týraly profılaktıkalyq áńgime ótkizdik. Uzatý toıda negizinen qart adamdar boldy, olar koronavırýspen aýrý qaýpi bar táýekel toptaǵy adamdar», - dep habarlady Almaly aýdanynyń ákimdigi janyndaǵy monıtorıng top ókili Erden Haırýllın.