Almatyda mıtıng ótkizý oryndary bekitildi
«El Prezıdenti Toqaev Qasym-Jomart Kemeluly árbir iri qalada mıtıngiler ótkizýge bolatyn ekinshi oryndy belgileý týraly tapsyrma bergenin bilesizder. Bizde birinshi oryn – «Saryarqa» kınoteatrynyń artynda ornalasqan gúl baǵy bolatyn. Biraq ol ýaqytsha oryn edi. Qazir ol zańdy túrde bekitildi. Al ekinshi oryn retinde M.Gandı atyndaǵy saıabaq belgilendi. Bastapqyda «Ońtústik» saıabaǵy usynyldy. Biraq komıssııa bul jer mıtıngiler ótkizýge beıimdelmegen degen sheshimge keldi», - dedi máslıhat depýtaty Rahman Alshanov.
Onyń sózinshe, zań jobasy qoǵamdyq keńeste talqylandy, Ulttyq qoǵamdyq senim keńesinde qaraldy. Al qazir QR Úkimetiniń qaraýynda jatyr.
Ol sondaı-aq beıbit jınalystar týraly habardar etý sıpaty qarastyrylǵanyn atap ótti.
«Habardar etý sıpaty engizildi. Biraq qashan jáne qalaı ótkiziletini jergilikti bılikpen kelisiledi. Sebebi aýrýhanalar, mektepter, áskerı bólimsheler aldynda syndy tyıym salynǵan oryndar bolady. Uıymdastyrýshylar ótinish beredi, ákimdik qarap, kelisedi», - dep túsindirdi Rahman Alshanov.
Bul rette, onyń aıtýynsha, jınalystardyń taqyryby men qatysýshylardyń sanyna shekteý qoıylmaǵan. Tek taqyryby bekitilgen zańǵa sáıkes kelýi tıis.
Eske salaıyq, Memleket basshysy Qasym-Jomart Toqaev Ulttyq qoǵamdyq senim keńesiniń otyrysynda qoǵamda mıtıng ótkizý mádenıetin qalyptastyrý kerektigin aıtqan bolatyn.
