Almatyda "Mıgrant" operatsııasy kezinde izdeýde júrgen 8 qylmysker ustaldy
ALMATY. Sáýirdiń 19-y. QazAqparat /Erlik Erjanuly/ - Almatydaǵy "Mıgrant" operatsııasy kezinde TMD elderiniń 1828 jáne alys shet memleketterdiń 258 azamaty ákimshilik jaýapkershilikke tartyldy, dep habarlaıdy QazAqparat qalalyq ishki ister departamentiniń baspasóz qyzmetine silteme jasap.
«Bul shara kezinde saýda úıleri, kafe, bar, meıramhanalar, kóńil kóterý oryndary, bazarlar men oǵan qarasty aýmaqtar, turǵyn úıler jáne sheteldikter turatyn meımanhanalar, jataqhanalar qaraldy. Sondaı-aq sheteldik jumys kúshi paıdalanylatyn 287 kásiporyn men uıym, sheteldikter oqyp jatqan 160 oqý orny jáne "otty" núktelerden kelgen 248 adamnyń meken-jaıy tekserildi", deıdi departamenttiń kóshi-qon polıtsııa basqarmasy bastyǵynyń orynbasary Aıkeldi Asanov. Onyń sózine qaraǵanda, operatsııa kezinde Qyrǵyzstannyń 412, Ózbekstannyń 271 azamatynyń elimizde bolýy merzimi qysqartylyp, 7 avtobýspen el aýmaǵynan shyǵaryldy. Almaty qalalyq aýdanaralyq mamandandyrylǵan ákimshilik sotynyń sheshimin oryndamaǵan Ózbekstannyń - 2, Tájikstanńyń - 1 azamatynyń ústinen qylmystyq is qozǵaldy. Sonymen qatar qylmys jasap izdeýde júrgen 1 ózbekstandyq pen 7 qazaqstandyq azamat ustaldy.
