Almatyda mıgratsııalyq HQO ashyldy

ALMATY. QazAqparat - «Azamattarǵa arnalǵan úkimet» memlekettik korporatsııasy QR Іshki ister mınıstrligimen birlesip Almaty qalasynda mıgratsııalyq halyqqa qyzmet kórsetý ortalyǵyn ashty, dep habarlaıdy QazAqparat korporatsııanyń baspasóz qyzmetine silteme jasap.

Qalada jyldyń basynan beri mıgratsııa baǵyty boıynsha  50 myńnan asa qyzmet kórsetilgen. Endi eńbek mıgranttary memlekettik qyzmetterdi halyqqa qyzmet kórsetý ortalyqtarynyń standartyna saı «bir tereze» qaǵıdaty boıynsha ala alady.

Bul - elimizdegi kóshi-qon qyzmetterin kórsetetin  úshinshi ortalyq, alǵashqysy osy jyldyń basynda Astanada, ekinshisi shilde aıynda Shymkentte  ashylǵan bolatyn.

Buryn sheteldikter jumys isteýge ruqsat alý úshin qajetti qujattaryn rásimdep, birneshe kún júretin. JSN alyp, salyq máselesin sheship, medıtsınalyq tekseristen, daktıloskopııadan ótip, saqtandyrý anyqtamasyna qol jetkizý úshin birneshe mekemeni aralaýǵa májbúr edi. Endi sheteldikter qujattardy bir jerde, bir saǵattyń ishinde rásimdeý múmkindigine ıe boldy.

«Mıgratsııalyq HQO-da shetel azamattary memlekettik qyzmetterdi belgilengen ýaqyt ishinde reglamentke saı bıznes úrdis jáne elektrondyq kezek arqyly arnaıy jabdyqtalǵan jumys oryndarynda ala alady. Bul mıgranttar úshin ǵana emes, jumys berýshi úshin de óte qolaıly. Jańa mıgratsııalyq HQO jumys barysyn jeńildetip qana qoımaı, sybaılas jemqorlyq áreketteriniń aldyn-alýǵa jol ashady», - deıdi «Azamattarǵa arnalǵan úkimet» memlekettik korporatsııasynyń Almaty qalasy boıynsha fılıalynyń dırektory Ǵalym Qarqynbaev.

Jańa front-keńse Alǵabas-1 yqshamaýdany, «Atletıkalyq qalashyqta» aýdany 576 sharshy metr, zamanaýı ǵımarattyń ekinshi qabatynda ornalasqan. Ortalyqta memlekettik korporatsııanyń 31 mamany tańǵy saǵat 09.00-den keshki saǵat 18.30-ǵa deıin, túski úzilissiz, kúnine shamamen 1,5 myńdaı azamatqa qyzmet kórsetedi.