Almatyda mıgratsııalyq halyqqa qyzmet kórsetý ortalyǵynda uzyn-sonar kezek paıda boldy

ALMATY. QazAqparat - Qazaqstanǵa maýsymdyq jumys isteý úshin sheteldik eńbek mıgranttary kelip jatyr. Osyǵan baılanysty, eldegi mıgratsııalyq halyqqa qyzmet kórsetý ortalyǵynda uzyn-sonar kezek paıda boldy. Bul týraly «Azamattarǵa arnalǵan úkimet» memlekettik korporatsııasy málim etti, dep habarlaıdy QazAqparat tilshisi.

Almaty mıgratsııalyq halyqqa qyzmet kórsetý ortalyǵyndaǵy uzyn-sonar kezektiń vıdeosy áleýmettik jelide paıda boldy.

«Eńbek mınıstrliginiń jańa baǵdarlamasyna baılanysty adamdar ekinshi kún qujat tapsyra almaı júr», - delingen jazbada.

Memlekettik korporatsııa baspasóz qyzmetiniń málimetinshe, buryn sheteldikterdiń jumys isteýine qajetti qujattardy Іshki ister mınıstrligi rásimdese, 2021 jyldyń 16 mamyrynan bastap Eńbek jáne halyqty áleýmettik qorǵaý mınıstrligi usynady.

«Osyǵan oraı, keıbir jaǵdaıda klıentterdiń tólqujat derekterin túzetý qajet. Biz kóshi-qon halyqqa qyzmet kórsetý ortalyqtarynda qyzmet kórsetýdi jedeldetý úshin bar kúsh-jigerimizdi salyp jatyrmyz. Qujattardy qabyldaıtyn qyzmetkerler sany ulǵaıtyldy. Tutynýshylardan bul jaǵdaıǵa túsinistikpen qaraýdy suraımyz», - dep jaýap berdi «Azamattarǵa arnalǵan úkimet» AQ baspasóz qyzmeti