Almatyda mıgratsııa polıtseıine para bergen kásipker 45 mln teńge aıyppul tóledi
ALMATY. QazAqparat - Almatyda qoǵamdyq tamaqtandyrý oryndarynyń basshylarynan júıeli túrde para alyp kelgen Almaly aýdandyq ІІB Mıgratsııalyq polıtsııa basshysynyń syıbaılasy taǵaıyndalǵan 45 mln teńge aıyppuldy ótedi, dep habarlaıdy QazAqparat tilshisi.
Almaty qalasynyń Qylmystyq ister jónindegi mamandandyrylǵan aýdanaralyq sotynyń baspasóz qyzmeti sottalýshy A.Gordııýk sot úkimimen taǵaıyndalǵan 45 mln teńge aıyppuldy tolǵymen ótegenin habarlady.
Eske sala keteıik, 2017 jyldyń maýsym aıynda Almaly aýdandyq ІІB mıgratsııalyq polıtsııa basshysy T.Arǵynbekovke qatysty sot úkimi shyqqan bolatyn. Ol Almaly aýdandyq ІІB-niń mıgratsııalyq polıtsııa bóliminiń basshysy bolyp turǵanynda sybaılasy M.Han jáne A.Gordııýkpen sóz baılasa otyryp, qaladaǵy birqatar qoǵamdyq tamaqtandyrý oryndarynyń basshylarynan júıeli túrde para alyp kelgen. Tamaqtandyrý oryndarynda zańsyz jumys istegen mıgranttarǵa «pana» bolýǵa ýáde bergen. Sot úkimimen T.Arǵynbekov QR QK 361-baby 2-bóligi, 366-babynyń 3-bóligi 2,4 tarmaǵymen kináli dep tanylyp, múlki tárkilenip, 8 jyl 2 aıǵa bas bostandyǵynan aıyrylǵan. Sonymen qatar, sot oǵan memlekettik jáne quqyq qorǵaý organdarynda ómir boıy jumys isteý quqyǵynan aıyrý jazasyn taǵaıyndaǵan bolatyn.
Al onyń sybaılasy, sot úkimimen M.Han QR QK 28-baby 5-bóligi, 366-babynyń 3-bóligi 2,4 tarmaǵymen kináli dep tanylyp, múlki tárkilene otyryp, 6 jylǵa bas bostandyǵynan aıyryldy.
Uıymdasqan qylmystyq topta mańyzdy ról atqarǵan ári turaqty túrde Arǵynbekovke para berip kelgen kásipker A.Gordııýk QR QK 367-baby 2-bóligi (para bergen) boıynsha kináli dep tanylyp, oǵan paranyń otyz eselengen somasy mólsherinde 45 000 000 teńge aıyppul óteý jazasy taǵaıyndaldy.
«Sottalýshy A.Gordııýk memleket paıdasyna 45 000 000 teńge aıyppuldy tólep, sotqa túbirtegin ótkizdi», - dedi atalǵan sottyń baspasóz qyzmetinen.
