Almatyda meıramhanalar men dámhanalar tabystaryn 15 esege deıin kemitip kórsetedi - qalalyq memlekettik kirister departamenti (FOTO)
ALMATY. QazAqparat - Almatyda meıramhanalar men dámhanalar tabystaryn 2 eseden 15 esege deıin kemitip kórsetedi. Bul týraly Almaty qalasy boıynsha memlekettik kirister departamenti men qoǵamdyq tamaqtandyrý salasy ókilderiniń kezdesýi barysynda málim boldy.
Atalmysh departamenttiń baspasóz qyzmetiniń habarlaýynsha, kezdesý barysynda hronometrajdyq zertteýlerdiń nátıjeleri jarııa etilip, salyq salýǵa baılanysty zań buzýshylyqtarǵa jol berilýge bolmaıtyndyǵy atap ótilgen.
«Qoǵamdyq tamaqtandyrý salasynda kiristerdi 2 eseden 15 esege deıin kemitip kórsetý jáne jumyskerlerdiń sanyn jasyrý (2 eseden 10 esege deıin) keń taraǵan. Sonymen qatar, alkogoldi ónimderge qatysty lıtsenzııanyń jáne joldama júkqujattardyń joqtyǵy, salyq esebiniń júrgizilmeıtindigi sekildi faktiler anyqtaldy», delingen habarlamada.
Mysaly, belgili meıramhanalardyń birinde hronometrajdyq zertteý júrgizý barysynda kiristerdi kemitip kórsetý deregi tirkeldi. Eger zertteýge deıin ortasha kúndik túsim 31,8 myń teńgeni qurasa, hronometrajdy zertteý barysynda bir kúnde túsetin kiristiń kólemi 183,2 myń teńgeni quraǵandyǵy belgili boldy. ıAǵnı, bir jyl ishinde esepke alynbaǵan tabystyń kólemi 50 mln. teńgeni quraıdy degen sóz. Al jaldamaly jumyskerlerdiń sany 2 ese azaıtylyp kórsetilgen.
Taǵy bir mekemede ortasha kúndik túsim 195 myń teńge bolǵandyǵy anyqtaldy. Al munda kún saıyn qolma-qol esep aıyrysý boıynsha 3-5 myń teńgege ǵana chek ótkizilgen. ıAǵnı, kiris 15 eseden asa kemitilgen. Al jyldyq aınalym 70 mln. teńgege kemitilgen. Odan basqa, jaldamaly jumyskerlerdiń sany 10 ese azaıtylyp kórsetilgen. Munda shyn máninde 34 adam jumys isteıtin bolsa, eseptemege tek 3 adam ǵana jazylǵan.
Taǵy bir joǵary sanatty meıramhanada tabystardyń 5 ese degen azaıtylatyndyǵy anyqtaldy. Eger hronometrajdyq zertteýge deıin kún saıyn túsetin tabystyń kólemi 75,5 myń teńgeni qurasa, tekserý barysynda bul soma kúnine taǵy 400 myń teńgege ulǵaıǵan. ıAǵnı, esepke alynbaǵan kiristiń jyldyq kólemi 115 mln. teńgeni quraǵan. Sondaı-aq, jaldamaly jumyskerlerdiń sany 2 esege azaıtylyp kórsetilgen (16 adamnan 8 adamǵa deıin). Odan basqa, 731 myń teńgege júkqujatsyz satyp alynǵan alkogoldik ónimder anyqtaldy.
Sonymen qatar, kezdesýge baqylaý-kassalyq mashınalar boıynsha tehnıkalyq qyzmet kórsetý ortalyqtarynyń qyzmetkerleri qatysyp, derekterdi tabystaý fýnktsııasy bar baqylaý-kasalyq apparattardy tirkeý jáne qoldaný erejesin túsindirdi.
Aıta ketelik, alkogoldik ónimder, dızeldik otyn jáne benzın satýshylar ústimizdegi jyldyń 1 shildesinen bastap derekterdi tabystaý fýnktsııasy bar baqylaý-kassalyq mashınalardy qoldanýǵa mindetti.
