Almatyda meıramhana órtendi
ALMATY. QazAqparat – Almatyda meıramhana kesheni órtendi, dep habarlaıdy QazAqparat tilshisi.
«Bostandyq aýdany, Dýlatı kóshesi, 171-úıde ornalasqan «Aqsaraı» meıramhana kesheniniń ashanasynda órt boldy. Ǵımarattyń astyńǵy qabatyndaǵy qoımada sekseýil bolǵan. Ot sol mańdaǵy ǵımarattardy da sharpýy múmkin edi», - dedi Almaty qalalyq tótenshe jaǵdaılar departamenti.
Órt sóndirýshilerdiń aıtýynsha, kóshede órtke qarsy sýmen qamtamasyz etý júıesi bolmaǵandyqtan, is qıynǵa soqqan.
Elektr jelisi qyzmeti shuǵyl túrde nysandy jaryqtan úzgen.
«Aǵashtan salynǵan eki qabatty jazǵy alańy men úsh qabatty meıramhanadaǵy órt sóndirildi. 200 sharshy metrdi jalyn sharpyǵan. Órtti sóndirýge 27 adam jáne 6 tehnıka jumyldyryldy», - deıdi tótenshe jaǵdaı departamentiniń ókilderi.
Órtten eshkim zardap shekpegen.
