Almatyda «Meıirimdilik kerýeni» jalpyhalyqtyq aktsııasy aıasynda qaıyrymdylyq kontsert uıymdastyryldy

ALMATY. QazAqparat- Búgin Almatyda Memlekettik uıǵyr mýzykalyq drama jáne komedııa teatrynyń gúlbaǵynda Qazaqstan halqy Assambleıasynyń «Meıirimdilik kereýeni» jalpyhalyqtyq aktsııasy aıasynda Halyqaralyq balalardy qorǵaý kúnine arnalǵan qaıyrymdylyq kontserti uıymdastyryldy.

Oǵan Qazaqstan halqy Assambleıasy, Almaty qalasyndaǵy etnomádenı birlestikterdiń músheleri, qoǵam qaıratkerleri, memlekettik organdar men úkimettik emes uıymdardyń ókilderi, metsenattar jáne jýrnalıster qatysty.

«Búgingi ıgilikti shara kómekke muqtaj bolyp otyrǵan naýqas balalarǵa qarjy jınaýǵa arnaldy. Sol úshin ortaǵa aqsha salatyn arnaıy jáshik qoıyldy. Odan jınalǵan qarajat balalardy emdeýge jumsalady. Mundaı sharalar budan keıin de turaqty túrde ótkiziletin bolady. Óıtkeni, balalarǵa qashanda qamqorlyq qajet.  Sondyqtan, biz aldaǵy ýaqytta da qoldan kelgen kómegimizdi kórsetetin bolamyz», - dedi Qazaqstan halqy Assambleıasy tóraǵasynyń orynbasary Leonıd Pıtalenko.   

Sonymen qatar, Leonıd Nıkolaevıch búgingi shara aıasynda qala turǵyndary men qonaqtaryn barynsha kóbirek tartý maqsatynda kishigirim ulttyq taǵamdar festıvali uıymdastyrylǵandyǵyn jetkizdi.

«Negizi, ár túrli ulttyń ókilderi ulttyq taǵamdardan dám tatý arqyly bir-birin tereń túsinedi. Bul olardyń bir-birine degen syılastyǵyn, qurmetin arttyrady. Sondyqtan, 10 etnomádenı birlestikterdiń kúshimen kishigirim ulttyq taǵamdar festıvali ótkizilip jatyr. Kelýshiler ózderi qalaǵan taǵamdardan tegin dám tata alady», - dedi L. Pıtalenko.

Búgingi sharaǵa qala turǵyndary men qonaqtary kóp jınaldy. Kópshiligi balalarymen keldi. Jazdyń jaımashýaq aýa raıy da kontserttiń kóńildi ótýine sep boldy.    

Qaıyrymdylyq sharasy aıasynda ulttyq taǵamdar jármeńkesi uıymdastyryldy. Oǵan kózdiń jaýyn alar, ıisi ańqyp, tábetińdi ashar neshe túrli ulttyq taǵamdar qoıyldy. Kelýshiler jármeńkeni aralap, ózderi unatqan taǵamdardan dám tatyp, qymyz-qymyran iship rıza bolysty. Sondaı-aq, qalalyq etnomádenı birlestikterdiń kúshimen qoıylǵan kontserttik baǵdarlamany tamashalap, balalarǵa arnalǵan qolóner jáne sándik óner jármeńkesin aralady.

Kelýshilerdiń barlyǵy derlik rıza kóńilmen, shama-sharqynsha arnaıy jáshikke aqsha tastap jatty. Búgingi sharadan jınalǵan qarajat aýyr dertke shaldyqqan 2011 jyly týǵan Sapar Ámına men 2000 jyly týǵan Aýǵambaı Zarınanyń emine jumsalady.

Qaıyrymdylyq aktsııasy odan ári jalǵasýda.