Almatyda metropolıten jelisin keńeıtýdi jalǵastyrý qajet - Memleket basshysy
ALMATY. QazAqparat – Memleket basshysy Qasym-Jomart Toqaevtyń Almaty qalasy jurtshylyǵymen kezdesýinde qoǵamdyq kólik salasyndaǵy kemshilikterdi atady, dep habarlaıdy QazAqparat.
«Qazir Almatyda jolaýshy tasymalynyń negizgi úlesi avtobýstar men trolleıbýstarǵa tıesili. Sonymen qatar, baǵdarlyq jeli jetkilikti túrde tıimdi uıymdastyrylmaǵan», - dedi Qasym-Jomart Toqaev.
Osy oraıda Prezıdent qalalyq baǵdarlardyń kóbisi óte uzyn ekenin, qala jáne qala mańyndaǵy qoǵamdyq kólikter bir-birimen nashar baılanysqanyn, tasymaldaý úshin yńǵaıly kólik toraptary joq ekenin atap ótti.
«Bul jaǵdaıdy tez arada ózgertýimiz kerek. Qoǵamdyq kólikterdiń tartymdylyǵyn dáıekti túrde arttyryp, sonymen birge jeke kólikterdi paıdalanýdy qysqartýdy yntalandyrý kerek. Bul rette metropolıten jelisin keńeıtýdi jalǵastyrý qajet», - dedi Memleket basshysy.
Sondaı-aq Prezıdenttiń aıtýynsha, mektepter men balabaqshalarǵa kólikpen kedergisiz barý máselesine nazar aýdarý kerek. Sebebi tańerteń, túste jáne keshki ýaqytta qala joldaryndaǵy kólik keptelisine atalǵan nysandarǵa baratyndar da áserin tıgizip otyr.
«Jalpy, jol men kólik salasyndaǵy problemalardy anyqtaý jáne tıimdi sheshimderdi ázirleý turǵysynda turǵyndar men táýelsiz sarapshylardy belsendi tartý qajet. Joldaǵy qaýipsizdik máselesi de qaladaǵy ómir sapasynyń mańyzdy quramdas bóligi bolyp sanalady. Oń úrdisterge qaramastan, jol-kólik oqıǵalary áli de jıi kezdesedi. Bul asa mańyzdy máseleni sheshý úshin keshendi sharalar qabyldaý qajet. Adamdar – bizdiń basty baılyǵymyz», - dedi Qasym-Jomart Toqaev.
