Almatyda metronyń jańa stansalary 2021 jyldyń tórtinshi toqsanynda paıdalanýǵa beriledi

ALMATY. QazAqparat – Almaty qalalyq mobıldilik basqarmasy «Saryarqa» jáne «Dostyq» stansalarynyń qurylys jumystarynyń barysy týraly aıtty, dep habarlaıdy QazAqparat tilshisi.

«Metropolıtenniń birinshi jelisi ekinshi kezeginiń ekinshi iske qosý kesheniniń qurylysy júrip jatyr. Bul «Máskeý» stansasynan B.Momyshuly kóshesine deıingi «Saryarqa» jáne «Dostyq» stansalary. Stansalardyń temir-beton qurylymdaryn, joldyń joǵarǵy jaǵyn salý jumystary aıaqtalýda, ınjenerlik jelilerdi montajdaý jumystary, sondaı-aq sáýlet-árleý jumystary bastaldy», - delingen Almaty qalasy qalalyq mobıldilik basqarmasynyń QazAqparatqa joldaǵan saýalynyń jaýabynda.

Budan bólek, úshinshi iske qosý kesheni – «Qalqaman» stansasynyń qurylys jumystary bastaldy. Ýchaske trassasy ıAsaýı kóshesinen batys baǵytqa qaraı Abaı dańǵyly arqyly Áshimov kóshesine deıin jáne ári qaraı soltústik baǵytta Baızaq batyr kóshesine deıin jalǵasady. «Qalqaman» stansasy Áshimov kóshesiniń astynda Elibaev kóshesi men Baızaq batyr kóshesine deıingi shekarada ornalasqan.

«Ekinshi iske qosý kesheni – metropolıtenniń birinshi jelisiniń ekinshi kezegindegi «Saryarqa» stansasy men «Dostyq» stansasy 2021 jyly paıdalanýǵa beriledi dep josparlanyp otyr. Qurylys jumystary bekitilgen kestege sáıkes júrip jatyr», - dep atap ótti basqarmadan.

Sonymen qatar, metropolıtendi batys baǵytqa qaraı «Máskeý» stansasynan «Batys» avtovokzal stansasyna deıin keńeıtý qarastyrylýda. Jeli ýchaskesine ekinshi iske qosý kesheni – «Saryarqa» stansasy men «Dostyq» stansasy, úshinshi iske qosý kesheni – «Qalqaman» stansasy, úshinshi kezek kiredi, onyń jobalyq jumystary júrgizilip jatyr.

Stansalar ár jyldary túrli merzimde ashylady dep boljanyp keldi, bastapqyda 2017 jyly, keıin 2020 jyly, 2021 jyldyń birinshi toqsanynda ashylatyny aıtylǵan edi.

Avtory: Danııar Dáýitálıev