Almatyda metro múgedek jandar úshin eń qolaıly kólik dep tanyldy
ALMATY. QazAqparat - Sarapshylar álemdik tájirıbeni basshylyqqa ala otyryp, Qazaqstandaǵy qoǵamdyq kólikterdiń múgedek jandar úshin jaılylyǵyn tekserdi, dep habarlaıdy QazAqparat tilshisi.
Tekserýdi megapolıste «Arýjan» qoǵamdyq qory Birikken Ulttar Uıymyn damytý baǵdarlamasy Jahandyq ekologııalyq qordyń «Almatynyń turaqty kóligi baǵdarlamasy aıasynda júrgizdi.
Almatyda barlyq baǵdar boıynsha 1400 avtobýs qatynaıdy. Onyń 800-ge jýyǵynda múgedek jandar úshin tómen eden jasalǵan. Sondaı-aq, «Neoplan Kazakhstan Young Man» markaly 212 trolleıbýsta da tómen eden bar. Avtobýstardyń mundaı qajetti talaptarǵa saı bolýy QR Kólik jáne kommýnıkatsııalar mınıstrliginiń 2013 jylǵy 1 qarashadaǵy №859-shy buıryǵynda kórsetilgen. Alaıda, zertteý avtorlary bul zań talaby jıi oryndala bermeıtinin aıtty.
Zertteýshiler Almatyda múmkindigi shekteýli jandar úshin qolaıly kólik túri metro ekenin aıtady. Onda kózi nashar kóretinderdiń poıyz baǵdarlaryn qadaǵalap otyrýyna arnalǵan saıt nusqasy men stansalarynda pandýstar jáne arnaıy sary jolaqtar jasalǵan. Sondaı-aq, Almaty metrosynyń stansalarynda múgedekter úshin arbalar jáne kezekshini kómekke shaqyrtý múmkindigi qarastyrylǵan.
Sarapshylar Almaty metrosynyń qyzmet kórsetip otyrǵan 9 stansasynyń ishinde «Máskeý» men «Saıran» stansalary múgedekter úshin óte qolaıly ekenin aıtty. Almaty metrosynyń basshylyǵy ár stansada jolaýshylar úshin kezekshi (shtattyq keste boıynsha 45 adam) qyzmetshiler jumys jasaıtynyn jetkizgen.
«Qazaqstanda 2017 jyldyń 1 qańtaryndaǵy esep boıynsha, 651 924 múgedek adam tirkelgen. Olardyń qoǵamdyq kólikti paıdalanýyna jaǵdaı jasaý -mańyzdy sharalardyń biri. Bárinen de qala basshylyǵy men jolaýshylar tasymalymen aınalysatyn kompanııa basshylarynyń mundaı máseleniń bar ekenin moıyndaýy mańyzdy. Ony sheshý úshin kólik jáne jaıaý júrginshilerge arnalǵan ınfraqurylymdy anyqtap, olardyń jaılylyǵyn tekserý qajet. Sonyń qorytyndysy boıynsha, naqty sharalar josparyn qabyldaý kerek», - dedi BUUDB JEQ «Almatynyń turaqty kóligi» baǵdarlamasynyń menedjeri Elena Erzakovıch.
