Almatyda meshit pen shirkeý mańynda alaıaqtyqpen aınalysyp kelgen 30 jastaǵy áıel áshkerelendi
ALMATY. 23 jeltoqsan. QazAqparat /Erlik Erjanuly/ - Almatyda 1 jyl boıy jurtshylyqty aldap, olardyń qarjysyn óz ıgiligine jumsap kelgen áıel ustaldy.
Tergeý amaldary kezinde onyń qaıyrymdylyq jasaýmen aınalysam dep óz árketterin meshitter men shirkeýler mańynda júzege asyryp kelgeni anyqtalyp otyr. Bir tańǵalarlyǵy, jábirlenýshilerdiń birde bireýi onyń naqty qaı jerde, qandaı qaıyrymdylyq ortalyǵynda tirkelgendigi týraly qujattaryn kórsetýin talap etpegen. Olardan 300 teńgeden 8-9 myń AQSh dollaryna deıin aqsha alǵan onyń arbaýyna 20-dan asa qala turǵyny túsken.
«Únemi qulshylyq etip, sadaqa berip júrgen azamattar meshit mańaıynan qaıyrymdylyq sharamen aınalysyp júrgen áıel habar-osharsyz ketkende ǵana kúdiktene bastaǵan. Aqyr sońynda ózderiniń alaıaq áıeldiń qurbanyna aınalǵandaryn sezgen soń polıtsııaǵa shaǵym túsirýden basqa amaldary qalmaǵan. Osyǵan oraı tártip saqshylary jedel tergeý tobyn quryp, kúdikti áıeldi izdeýge kirisedi. Nátıjesinde ońaı aqshaǵa kenelgen kúdikti Almaty oblysyndaǵy úıinde quryqtaldy. Qazirgi tańda oǵan qatysty QR QK 177-babynyń 3-tarmaǵyna sáıkes alaıaqtyq faktisi boıynsha qylmystyq is qozǵaldy», deıdi Almaty qalasy ІІD baspasóz kyzmetiniń ókili Talǵat Seıilbaev. Onyń aıtýynsha, tergeý amaldary aıaqtalǵansha zardap shekkender sany arta túsedi degen boljam bar.
