Almatyda mergenderdiń "Altyn nysana" týrnıri ótýde
ALMATY. Jeltoqsannyń 5-i. QazAqparat /Erbol Azanbek/ - Jeltoqsannyń 4-14 aralyǵynda A. Asanovtyń nysana kózdeý klýbynda «Altyn nysana» atty dástúrli týrnır ótýde,
dep habarlaıdy QazAqparat QR Stendik jáne tájirıbelik atý federatsııasyna silteme jasap.
Týrnırge myltyq atý sportynyń «Sportıng-kompakt» túri boıynsha 12, «Aınalma stend» túri boıynsha 12, «Transheıalyq stend» túri boıynsha 12, barlyǵy 36 sportshy qatysady. Saıystyń ár túri boıynsha júlde qory 1 mıllıon teńge. Federatsııa prezıdenti Tımýr Isataevtyń aıtýynsha, bıylǵy jyly saıystyń transheıalyq túri boıynsha báseke alǵash ret ótkiziledi. Sondaı-aq jarysqa tuńǵysh ret eki áıel sportshy qatyspaq. «Altyn nysana» týrnıri kásibı nysana atýshylardyń reıtıngin kóterý, jyldyń 12 eń úzdik mergenin anyqtaý maqsatynda uıymdastyrylyp keledi. Dástúr boıynsha bıyl da týrnır sońynda 2009 jyldyń eń úzdik 12 sportshysy anyqtalady.
