Almatyda mereke kúni úsh myńnan astam adam vaktsına saldyrdy
ALMATY. QazAqparat - Almaty qalasynda bir táýlikte 3 myńnan astam adam koronavırýsqa qarsy vaktsına saldyrdy, dep habarlaıdy QazAqparat tilshisi.
«7 mamyr kúni 3018 almatylyq vaktsına saldyrdy. Turǵyndar úsh vaktsınanyń ishinen tańdaý jasaı alady. Atap aıtar bolsaq, «Spýtnık-V», «QazVac» jáne «Hayat-Vax» ekpesi», - dep habarlady qalalyq Qoǵamdyq densaýlyq saqtaý basqarmasynyń baspasóz qyzmetinen.
Bıylǵy jyldyń 1 aqpany men 7 mamyr aralyǵynda qalada barlyǵy 247 104 adamǵa ekpe salyndy. Vaktsınatsııanyń jalpy sanynan 60 jastan asqan qart kisiler sany - 30 292.
Búgingi kúni qalada 214 pýnkt jumys istep tur. 1 282 adamnan turatyn 315 egý brıgadasy bar. Sonymen qatar, 40 kóshpeli mobıldi brıgada uıymdastyryldy.
«Qazirgi medıtsınalyq uıymdarda, mektepterde, mádenıet, sport obektilerinde, bazarlar men qalanyń SOSO-da vaktsınatsııa pýnkti jumys isteıdi» - dep atap ótti basqarmadan.
