Almatyda Mercedes-Benz Fashion Week Almaty sán aptalyǵy ótedi
ALMATY. QazAqparat - Almatyda Mercedes-Benz Fashion Week Almaty sán aptalyǵynyń úshinshi maýsymy bastalady. 24-26 sáýir aralyǵynda «Atakent» Qazaqstannyń Іskerlik yntymaqtastyǵy ortalyǵynda otandyq jáne sheteldik dızaınerler 2015-2016 jyldardyń kúzgi jáne qysqy toptamasyn jurtshylyq nazaryna usynady.
Osyǵan baılanysty ótken baspasóz máslıhatynda uıymdastyrýshylar «Atakent» kesheni sán aptalyǵyna qatysty basqa da birqatar sharalardy ótkizýge múmkindik beretindigin aıtty. Sonymen qatar, aptalyq aıasynda Mercedes-Benz S-class Coupe jańa avtokóliginiń tusaýkeser rásimi bolady.
«Sharanyń basty maqsaty - qazaqstandyq dızaınerlerdiń jumysyn álemdik naryqqa shyǵarý jáne jergilikti naryqty damytý. Ótken maýsymda Vogue (Italy), The New York Times (USA), Elle (Italy basylymdarynyń strıtstaılfotograftary keldi. Bul Qazaqstannyń álemdik sán naryǵyndaǵy jaıǵasymyn nyǵaıta túsedi » - dedi MBFWAlmaty bas dırektory Janel Bertaeva.
Onyń aıtýynsha, ústimizdegi jyly kúzde London Fashion Week sán aptalyǵy aıasynda Qazaqstandyq bes dızaıerdiń bólek Show-case kórsetilimi bolady. Sonymen qatar, aldaǵy jyly ınternet dúkenderde MBFWAlmaty sán aptalyǵyna qatysýy dızaınerlerdiń toptamalarynyń satylymy bolady.
Sán aptalyǵynyń úshinshi maýsymyna aldyńǵy qatarly otandyq dızaınerler - Aıgúl Qasymova, Leonıd Jerebtsov qatysýda. Sharanyń basty qonaqtary - belgili ıtalıandyq dızaıner Andrea jáne frantsııalyq dızaıner Rodjı Kolın. Aka Nanita - sán aptalyǵyndaǵy basty brendterdiń biri.
Odan basqa, bıylǵy maýsymda sán aptalyǵy «Stop melanoma» uranymen ótýde. Maqsat - osy bir onkologııalyq dertke qoǵam nazaryn aýdarý.
«Sán men densaýlyqty bir-birinen bólip qaraýǵa bolmaıdy. Adam óz densaýlyǵyn ǵana kútip qoımaı, týǵan-týystarynyń densaýlyqtaryna da qamqorlyqpen qaraýy kerek. Eger teride qandaı da ir isik paıda bolsa tez arada dárigerge kóringen jón», - dedi Qazaqtyń onkololgııa jáne radıologııa ǵylymı-zertteý ınstıtýtynyń ǵylymı qyzmetkeri Ál-Farabı Qurmanálıev.
