Almatyda menıngokokk juqpasynan 27 jastaǵy jigit qaıtys boldy
ALMATY. QazAqparat - Almatyda menıngokokk juqpasynan 27 jastaǵy órt sóndirýshi jigit 12 saǵatta qaıtys bolyp ketti, dep habarlaıdy QazAqparat tilshisi.
Oljas Súleımenov 2 maýsymda dene qyzýy kóterilip, tamaǵy aýyryp, aýrýhanaǵa jetkizilgen.
«2 maýsymda kúni boıy qyzýy kóterildi. Ol jaı tumaý shyǵar dep mán bermedi. Keshke jaǵdaıy nasharlaǵan soń jedel járdem shaqyrdyq. Alaıda, tańǵa jýyq qaıtys bolyp ketti», - dedi Oljastyń týǵan aǵasy Erbolat.
Marqumnyń jaqyndary jerleý sharasyn búginge josparlaǵan bolatyn.
Alaıda, olar marqumnyń denesin máıithanadan ala almaı jatyr. Múrde saraptamaǵa jiberilgen.
Aǵasynyń aıtýynsha, Oljas aýyrǵan bette jedel járdem shaqyrǵan. Qalalyq juqpaly aýrýlar aýrýhanasynda oǵan juqpaly respıratorly vırýs degen dıagnoz qoıylyp, antıbıotık alyp úıine qaıtarylǵan.
Úıine jetkizilgen Oljastyń jaǵdaıy odan ári nasharlaǵan soń túnde jigitti qaıtadan aýrýhanaǵa alyp ketken. 3 maýsymda tańǵa jýyq jigit qaıtys bolyp ketti.
Dosynyń aıtýynsha, Oljas qalalyq TJD órt sóndirýshi bolyp jumys istegen.
Sonymen qatar, qazir juqpaly aýrýlar aýrýhanasynda Oljaspen baılanysta bolǵan adamdar da baqylaýǵa alyndy.
Aıta ketý kerek, búginde Almatyda menıngokokk juqpasynan 5 adam kóz jumdy. Olardyń barlyǵynda menıngokok juqpasynyń gerenalızdi formasy bolǵan. Jedel asqynýdyń kesirinen nebári 3-5 saǵatta marqum bolyp ketti.
Olardyń ishinde 4-5 jastaǵy balalar bar.
Al, Almaty oblysynda qaza bolǵandardyń sany 3 adamǵa jetti.
Sondaı-aq, Qyzylorda oblysynda 27 jastaǵy jigit atalǵan juqpadan kóz jumǵan.
