Almatyda menıngıttiń jappaı taraýy bolǵan joq - mamandar
ALMATY. QazAqparat - Almatyda áleýmetik jeli qoldanýshylary serozdy menıngıt aýrýynyń taralyp jatqanyn aıtyp, ǵalamtordy dúrliktirgen bolatyn. Osy máseleniń anyq-qanyǵyn bilý úshin qalalyq qoǵamdyq densaýlyq saqtaý departamentine habarlastyq. Bizdiń saýalymyzǵa departament basshysynyń mindetin atqarýshy Murat Birjanov jaýap berdi.
- Murat Qarǵashuly, áleýmetik jelide qalalyqtar serozdy vırýsty menıngıttiń taralyp jatqany týraly habarlap jatyr. Osy aqparat turǵyndar arasynda qorqynysh týǵyzýda. Bireýler balasyn jazǵy lagerge, bireýler basseınge jiberedi. Qaýeset qanshalyqty ras?
- Jazda Almatyda jylda serozdy menıngıtpen aýyrý jaǵdaılary kezdesedi. Bul derttiń qozdyrǵyshy - enterovırýstar. Bul jylda jazda kezdesedi. Dál qazir sol maýsym keldi. Jalpy alǵanda qazir Almatyda epıdemıologııalyq ahýal turaqty. Jyl basynan beri 8 jaǵdaı zerthanalyq taldaýlarmen rastaldy. Alpy jappaı taraý bolǵan joq. Menıngok juqpasyn juqtyrý jaǵdaıy múlde tirkelgen joq.
- Ótken jylǵymen salystyrǵanda aýrý kórsetkishi artyp kele me?
- Joq. kerisinshe tómendep keledi. Osy kezeńde byltyr 13 jaǵdaı tirkelgen. ıAǵnı 41 paıyzǵa tómen.
- Bul aýrý tek balalarǵa ǵana qaýip týǵyza ma álde eresekter de saqtanýy kerek pe?
- Negizinen, eń kóp aýyratyn 3-6 jas aralyǵyndaǵy balalar. Jasy ulǵaıa kele adamnyń serozdy menıngıt qozdyrǵyshyna degen qarsylyǵy ulǵaıyp, ımmýnıtet paıda bolady. Sondyqtan, eresek adamdar óte sırek aýyrady.
- Qazaqta sóz bar aýyryp em izdegenshe, aýyrmaıtyn jol izde degen. Aýyrmaýǵa qandaı keńes beresiz?
- Eń aldymen aldyn alý úshin jeke bas gıgıenasyn saqtaý mańyzdy. As ishýdiń aldynda, ájethanadan soń qoldy sabyndap jýý, jemis-jıdekti jaqsylap tazalap jeý kerek. Balalar tek tazartylǵan nemese qaınaǵan sý ishkeni abzal. Sýǵa túskende de tek tekserilgen sýǵa ǵana túsýge, kez-kelgen kólshikterge shomylýdan aıaq tartqan durys.
- Suhbatyńyzǵa rahmet.
