Almatyda menıngıt epıdemııasy joq - mamandar
ASTANA. QazAqparat - Qoǵamdyq densaýlyq saqtaý departamenti áleýmettik jelide taraǵan Almatydaǵy menıngokokk ınfektsııasy týraly habarlamaǵa qatysty jaýap berdi, dep habarlaıdy QazAqparat.
Almaty turǵyndarynyń basym bóligi áleýmettik jelide taraǵan habarlamadan soń dúrbeleń týǵyzǵan.
«Almatyda menıngokokk ınfektsııasy ázirge úsh eresek adamnan tabyldy. Eger dene qyzýy kóterilip, muryn bitelse nemese tamaq aýyrsa - juqpaly aýrýlar aýrýhanasyna baryńyz. Halyq kóp jınalǵan, balalar júrgen jerge barmaýǵa tyrysyńyz», - delingen habarlamada.
Taǵy bir habarlamada menıngıtten úsh balanyń aýrýhanaǵa jatqyzylǵany, 4 jasar balanyń qaıtys bolǵany jáne naýqastar sany 40-qa jetkeni aıtylǵan.
Almatynyń Qoǵamdyq densaýlyq saqtaý departamenti menıngıt epıdemııasy týraly aqparatty joqqa shyǵardy.
«Búginde Almaty turǵyndary arasynda aýrý sany kóbeıdi, biraq juqpaly aýrýdyń taralý oqıǵasy bolǵan joq. 19 mamyrda 15 adamnyń menıngokokk ınfektsııasyn juqtyrǵany zerthanalyq turǵyda rastaldy. Bir jaǵdaıda ǵana klınıkalyq dıagnoz qoıylǵan. Qalǵan oqıǵalar bir-birimen baılanysty emes. Bir adamnyń ınfektsııa taratqany anyqtaldy. Munyń sebebi - maýsymdyq, turaqsyz aýa raıy jaǵdaılary, aýrýlardyń qaıtalanýy jáne ımmýnıtettiń tómendeýi», - dep habarlady Almatynyń Qoǵamdyq densaýlyqty saqtaý departamenti.
Ázirge syrqattan úsh adamnyń kóz jumǵany belgili, onyń ekeýi eresek bolsa, bireýi - bala. Odan basqa eki óńirde - Almaty (2) jáne Ońtústik Qazaqstan (2) oblystarynda menıggokokk ınfektsııasymen aýyrǵandar tirkelgen.
Vedomstvonyń habarlaýynsha, menıngokokk ınfektsııasy úsh jylda bir ret beleń alady. Eń kóp naýqastar tizimi 2013 (49 naýqas) jáne 2015 (66 naýqas) tirkelgen.
«Qazirgi ýaqytta jaǵdaıdy Densaýlyq saqtaý mınıstrligi baqylap otyr. Epıdemııaǵa qarsy jáne aldyn alý jumystary keshendi túrde júrgizilip jatyr. Mindetti zerthanalyq tekserý taǵaıyndalǵan adamdardyń aralasý ortasy anyqtalyp jatyr», - delingen vedomstvo habarynda.
Sondaı-aq, dárigerler dene qyzýy kóterilip, tamaǵy aýyrǵandarǵa Almatydaǵy halyq kóp jınalatyn mádenı-sporttyq sharalarǵa, basseınder men oıyn-saýyq ortalyqtaryna barmaýǵa, atalǵan belgilerdi baıqaǵan jaǵdaıǵa dárigerge júginýge keńes berdi.
