Almatyda «Meniń súıikti anama» atty kórme ashyldy
Y. Naýryzdyń 1-i. QazAqparat /Názıra Eleýhan/- Búgin Almatyda «Spýtnık» saýda oıyn-saýyq ortalyǵynda Naýryzdyń 8-i - halyqaralyq áıelder merekesine arnalǵan «Meniń súıikti anama» atty múmkindigi shekteýli balalar shyǵarmalarynyń kórmesi ashyldy,
dep habarlaıdy QazAqparat.
Áýezov aýdany ákimdiginiń qoldaýymen, Áýezov aýdanynyń múgedekterdi ońaltý jáne beıimdeý ortalyǵy jáne «Spýtnık» saýda oıyn-saýyq ortalyǵynyń uıymdastyrýymen ótken sharaǵa múmkindigi shekteýli balalar qatysyp, óz týyndylaryn kórmege qoıdy.
«Balalar densaýlyq jaǵdaıyna qaramastan, halyqqa ómirdiń ásemdigin jetkizýge tyrysqan. Kórmege Áýezov aýdanynda turatyn múmkindigi shekteýli balalardyń 100-den asa jumystary qoıyldy. Sharaǵa 30 bala shaqyryldy. Saýda ornyna kelýshiler balalardyń shyǵarmashylyǵyna baǵa berip, qoıylǵan jáshikterge daýysyn bere alady. Ádilqazylar alqasy kórme sońynda jeńimpazdardy anyqtaıtyn bolady. Sharanyń basty maqsaty - kóktemniń birinshi kúninde balalarǵa qýanysh syılaý, shyǵarmashylyq qabiletterin arttyrý, olarǵa kóńil bólý bolyp tabylady», dedi Áýezov aýdanynyń múgedekterdi ońaltý jáne beıimdeý ortalyǵynyń dırektory Tursyn Mýsına. Onyń aıtýynsha, Áýezov aýdanynda múmkindigi shekteýli 570 bala turady, onyń 245-i múgedekterdi ońaltý jáne beıimdeý ortalyǵynda kómek alýda.
Aktsııa barysynda balalar saýda ornyndaǵy «BABYLON» parkindegi attraktsıondarǵa tegin otyryp, merekelik shoý-baǵdarlamany tamashalady. Shara sońynda «Spýtnık» saýda ortalyǵy balalarǵa óz syı-syıapattaryn tabys etti.
Aktsııa naýryz aıynyń 22-ne deıin jalǵasady. Baıqaý sońynda qatysýshylar baǵaly syılyqtarmen marapattalatyn bolady.
