Almatyda «Meniń atym Qoja» fılminde Qoja rólin oınaǵan Nurlan Sanjardyń 60 jasqa tolǵan mereıtoıy atalyp ótildi
ALMATY. 30 qazan. QazAqparat /Názıra Eleýhan/ - Almatyda Kıno úıinde akter, kınodramatýrg, ǵalym, pedagog, fılosofııa ǵylymdarynyń kandıdaty, QR eńbek sińirgen qaıratkeri, «Meniń atym Qoja» fılminde Qoja rólin somdaǵan Nurlan Sanjardyń 60 jasqa tolǵan mereıtoılyq shyǵarmashylyq keshi bolyp ótti.
Keshke onyń janyna jaqyn ónerdegi jáne ómirdegi dostary, týystary men qazir ózi jumys jasaıtyn Sh.Aımanov atyndaǵy «Qazaqfılm» kınostýdııasynyń ujymy qatysty.
Mereıtoılyq kesh Nurlan Sanjardyń 60 jyldyǵyna oraı arnaıy túsirilgen, onyń ómiri men shyǵarmashylyǵyna arnalǵan derekti fılmmen bastaldy.
Keshte mereıtoı ıesin Sh.Aımanov atyndaǵy «Qazaqfılm» AQ prezıdenti Ermek Amanshaev, Kınomatografıster Odaǵynyń tóraǵasy Igor Vovnıanko, akademık Ábdimálik Nysanbaev jáne onyń kóptegen ónerdegi dostary quttyqtap, óz syı-syıapattaryn jasady.
«Men eshqashan akter bolamyn dep oılamap edim, biraq taǵdyr kınoǵa ákeldi. Kınonyń dámin sezgen adam, odan qaıtyp eshqaıda kete almaıdy eken. Men pedagogıkaǵa, jýrnalıstıkaǵa, tipti ǵylymǵa da ketsem de, qaıta aınalyp kınoǵa keldim. Biraq, shyǵarmashylyq ortadan esh ajyraǵan emespin. Meniń shyǵarmashylyq ómirim endi ǵana bastaldy», - dedi mereıtoı ıesi kesh barysynda.
Keshtiń ashylý saltanatynda Sh.Aımanov atyndaǵy «Qazaqfılm» AQ prezıdenti Ermek Amanshaev Nurlan Sanjardyń Qoja rólin oınaǵandaǵy erekshe talantyn atap ótip: «Bul shyn sheberdiń qolynan shyqqan týyndy, Qazaqstan kınoprokatyndaǵy teńdesi joq úzdik fılmge aınaldy. Ol fılmmen aǵa urpaq eseıip, keıingi tolqyn da tálim-tárbıe alýda. Qansha jyldar ótse de, bul fılm qundylyǵyn joǵaltpaı, bizden keıingi, odan da keıingi urpaqtyń júreginen oryn alatynyna senemin. Al, bul fılmde basty róldi oınaǵan akter Nurlannyń sheberligi qazaq kınematografııasy tarıhynda erekshe oryn alyp qala bereri sózsiz», - dedi.
Ol sonymen qatar,: «Nurlan búginde stsenarıst, ǵalym, pedagog retinde zor eńbek sińirip keledi. Ol kóptegen ǵylymı jumystardyń avtory, túrli halyqaralyq ǵylymı-tájirıbelik jáne ǵylymı-teorııalyq konferentsııalardyń qatysýshysy, QazUÝ-diń ustazy. Onyń stsenarııi boıynsha «Solomınka ýdachı», «Dıagnoz», «Allajar», «Perishte» dep atalatyn kórkem kartınalar, «Bata», «Astana - QR astanasy», «Shabyt», «Qaraqııa» dep atalatyn derekti fılmder túsirilip, ekranǵa shyqty. Ol sonymen qatar, «Shyǵarmashylyq sheberhana, nemese kommýnıkatıvtik tájirıbe týraly dıalogtar» dep atalatyn kólemdi monografııanyń avtory. Jan-jaqty tulǵanyń, talantty kınodramatýrgtyń aldaǵy ýaqytta áli de bereri mol dep oılaımyz. Sondyqtan, biz Sizge zor densaýlyq, taýsylmas shyǵarmashylyq tabystar tileımiz!», - dedi.
Nurlan Sanjardyń shyǵarmashylyǵy 12 jasynan bastalǵanyn búginde búkil dúıim jurt biledi. Talantty balany 1963 jyly qazaq kınorejısseri Abdolla Qarsaqbaev baıqap, «Meniń atym Qoja» tolyqmetrajdy kórkem fılmniń basty róline shaqyrǵan bolatyn. Fılm 1964 jyly respýblıkanyń jáne KSRO ekrandaryna shyǵyp, úlken tanymaldylyqqa ıe boldy, onymen birge fılmniń avtorlary jáne sol fılmde oınaǵan akterler tanymal boldy. Atap óterligi, bul fılm qazaq kınematografııa tarıhynda tuńǵysh ret 1965 jyly halyqaralyq Kann festıvalinde alǵashqy halyqaralyq marapatqa ıe bolǵan bolatyn. Odan keıin bul kınotýyndy Máskeý, Dýshanbe, Tashkent jáne t.b halyqaralyq kınofestıvalderde júldeli oryndardy aldy. Búginde «Meniń atym Qoja» fılmi ultymyzdyń rýhanı qazynasyna, búkil eldiń kóńilinen shyqqan, ekran kórki bolǵan klassıkalyq týyndyǵa aınaldy.
Jaqynda Qazposhta óziniń 100 jyldyq mereıtoıyna arnap, «Meniń atym Qoja» fılmindegi kadrler beınelengen marka da shyǵardy.
Mereıtoı ıesine keletin bolsaq, Nurlan Sanjar búkil ómirin qazaq kınematografııasyna arnap keledi. 1974 jyly Óskemen pedınstıtýtyn bitirip, VGIK-te stsenarlyq fakýltette (1978-1982 j.) oqydy. Onda Keńes dáýiriniń korıfeıi bolyp tabylatyn kınodramatýrg Evgenıı Gavrılovıchte bilim aldy. Ol jerde ekinshi kýrsta oqyp júrgende onyń alǵashqy «Solomınka ýdachı» dep atalatyn qysqa metrajdy stsenarııin «Qazaqfılm» kınostýdııasy satyp alǵan bolatyn. Sol ýaqyttan beri Nurlan Sanjar «Qazaqfılm» kınostýdııasymen jumys istep keledi. Oqýyn bitirgen soń, ol osy kınostýdııada (1982-1987 j.) kórkem fılmderdiń redaktory, odan keıin Qazaqstan ulttyq arnasynda (1987-1990 j.) redaktor bolyp qyzmet atqardy.
2006 jyldan Ál-Farabı atyndaǵy QazUÝ-niń jýrnalıstıka fakýltetinde ustazdyq qyzmet etti. Al, 2010 jyldan beri N.Sanjar ǵylymı-pedagogıkalyq qyzmetin shyǵarmashylyqpen birge alyp keledi. Qazir ol Sh.Aımanov atyndaǵy «Qazaqfılm» kınostýdııasynda redaktor qyzmetin atqarýda.
