Almatyda meńgerýshisi týberkýlezge shaldyqqan balabaqsha karantınge jabylmaıdy
ALMATY. QazAqparat - Almatyda №144 memlekettik balabaqsha meńgerýshisinen týberkýlez tabylýyna baılanysty mekeme karantınge jabylmaıtyn boldy. Bul týraly qalalyq Qoǵamdyq densaýlyqty qorǵaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
Departament basshysynyń aıtýynsha, áıel óziniń dıgnozyn jaqynda bilgen.
«Ftızıopýlmanologııa Ulttyq ortalyǵynda tekserilý kezinde áıeldiń týberkýlezge shaldyqqany anyqtaldy. Áıel adam balabaqsha meńgerýshisi bolyp qyzmet etken. Ol únemi tekserilýden ótip turatyn. Barlyq analızder jaqsy bolǵan. Sońǵy ret 2018 jyldyń sáýirinde ótken», - dedi Aızat Moldaqasymova.
Qazir naýqastyń úıi men balabaqshada indetke qarsy sharalar júrgizilip jatyr. Atap aıtqanda, naýqastyń 21 áriptesi men 142 bala túgel dárigerlerdiń baqylaýyna alyndy. Olar mindetti túrde rentgen tekserýinen ótedi.
Alaıda, aýyr juqpa tabylǵan balabaqshany mamandar karantınge jabýǵa asyǵar emes.
«Týberkýlez juqpasy karantınge jabýǵa sebep bolatyn juqpa emes. Ol ózi «baıaý» ınfektsııalar túrine jatady. Karantınge jabýǵa jelsheshek, qyzylsha, gepatıt juqpalary sebep bolady. Óıtkeni olar tez taraıdy. Taraý tizbegin úzý úshin karantın jarııalanady. Týberkýlez juqpasyn juqtyrý qaýpi óte tómen. Adamnan týberkýlez juqpasyn juqtyrý úshin uzaq merzimdi baılanysta bolý kerek. 1 jyldan soń adamdardyń ımmýnıteti qalyptasady. Odan ári perzenthanada sábı kúninde alǵan BTsJ ekpesiniń 6-7 jyldyń ımmýnıtteti qalyptasady. Sondyqtan, balabaqsha shtattyq rejimde jumys jasaıdy», - dedi departament basshysy A. Moldaqasymova.
Búginde ulttyq ekpe kúntizbesinde týberkýlezden qaıtalap ekpe salý qarastyrylǵan.
«Immýnıteti qalyptaspaǵan 1 synyp oqýshylaryna qaıtalap salynady. Halyq aýzyndaǵy «juqpaly týberkýlez» degen sóz naýqastyń qaqyryǵynda qozdyrǵyshtar ber degendi bildiredi», - dedi A.Moldaqasymova.
Qazirgi tańda ınfektsııanyń juǵý kózin anyqtaýǵa barlyq sharalar jasalyp jatyr.
Aıta ketý kerek, Almatyda №144 balabaqsha meńgerýshisine týberkýlezdiń juqpaly túriniń dıagnozy qoıylǵan bolatyn. Osy ýaqıǵaǵa baılanysty balabaqsha ujymy men ata-analar óte qobaljýly ekendikterin bildirgen bolatyn.
