Almatyda «Men jastarǵa senemin!» respýblıkalyq jastar forýmy ótti
Sharany QR Bilim jáne ǵylym mınıstrligi, Aqparat jáne qoǵamdyq damý mınıstrligi, «Jandaný álemi» qory, «Zhas Otan» jastar qanaty, Qazaqstan Jazýshylar odaǵy, ál-Farabı atyndaǵy QazUÝ jáne Almaty ákimdigi uıymdastyrdy.
«Men jastarǵa senemin!» respýblıkalyq jastar forýmynyń basty maqsaty – ınnovatsııa men shyǵarmashylyqty ushtastyrý arqyly patrıotızmdi damytý.
Forým uıymdastyrýshylarynyń aıtýynsha, shara baǵdarlamasyna 2013 jyldan bastap dástúrli túrde «Qazaqstannyń ınnovatsııalyq damýyna qosqan meniń naqty úlesim» atty úzdik stýdenttik ınnovatsııalyq jobalar baıqaýy, «Men óz elimniń órkendeýi úshin ne isteı alamyn?» atty úzdik esse jazý, úzdik poetıkalyq shyǵarma jáne patrıottyq taqyryptaǵy ánder saıysy kiredi.
«Jyl saıyn Uıymdastyrý komıtetine túsken jobalar men shyǵarmashylyq jumystar sanynyń artýy - baıqaýdyń tanymaldylyǵy men qajettiliginiń dáleli. Forým el kóleminde jastardyń patrıottyq sezimin, azamattyq jaýapkershiligin jáne zııatkerlik-shyǵarmashylyq áleýetin damytýǵa baǵyttalǵan mańyzdy alańǵa aınaldy», - deıdi uıymdastyrýshylar.
Jastar jyly - jastar bastamalaryn yntalandyrýǵa jáne qoldaýǵa jańasha serpin berdi. Forým qorjynyna parasattylyq qaǵıdattaryn stýdenttik ortada ilgeriletý boıynsha jobalar, sondaı-aq jumys isteıtin jastar ókilderiniń ıdeıalary qosyldy.
«Bıyl uıymdastyrý alqasyna baıqaýǵa qatysý úshin elimizdiń barlyq aımaǵyndaǵy 100-den astam joǵary oqý ornynan 1,5 myńnan astam ótinish kelip tústi. Onyń ishinde jeke jobalar men shyǵarmalar, sonymen qatar ujymdyq shyǵarmashylyq jumystar da bar. Bedeldi sarapshylardan, qoǵam qaıratkerlerinen, memlekettik qurylym, BAQ pen bıznes ókilderinen, ǵalymdar, din, mádenıet jáne óner qaıratkerlerinen quralǵan táýelsiz qazylar alqasy kelip túsken jumystar ishinen 620-dan astam úzdik jumysty tańdap aldy», - dep atap ótti uıymdastyrýshylar.
Baıqaý jeńimpazdary men júldegerleri dıplomdarmen jáne baǵaly syılyqtarmen marapattalady. Birinshi oryn ıegerlerine ál-Farabı atyndaǵy QazUÝ-da bir jyl tegin oqý granty beriledi, úmitkerlerdiń shyǵarmashylyq jumystary arnaıy jınaqta jaryq kóredi.
Forýmnyń saltanatty marapattaý rásimine Vıtse-premer B.M. Saparbaev. Sybaılas jemqorlyqqa qarsy is-qımyl agenttigi tóraǵasynyń birinshi orynbasary O. Bektenov, QR Bilim jáne ǵylym mınıstri A.Q. Aımaǵambetov, QR Aqparat jáne qoǵamdyq damý mınıstri D.Á. Abaev, Almaty q. ákiminiń orynbasary E.J. Babaqumarov, ál-Farabı QazUÝ rektory akademık Ǵ.M. Mutanov, tanymal qoǵam jáne memleket qaıratkerleri, stýdentter jáne elimizdiń ár óńirinen kelgen jastar qatysty.
