Almatyda Memlekettik tý saltanatty túrde kóterildi
ALMATY. QazAqparat - Almatyda 4 maýsym – Memlekettik rámizder kúnine oraı «Medeý» bıik taýly sport kesheninde Memlekettik tý saltanatty túrde kóterildi, dep habarlaıdy QazAqparat tilshisi.
Memlekettik týdy «Batyr» Prezıdenttik polkiniń áskerıleri kóterý sátinde qalanyń barlyq aýmaǵynda, ıaǵnı, saǵat 11.00-de Ánuran shyrqaldy. Almaty turǵyndary saıabaqtarda, skverlerde, mektepterde jáne basqa da qoǵamdyq oryndarda elimizdiń Ánuranyn oryndady.
Saltanatty sharaǵa Almaty ákimi Erbolat Dosaev, máslıhat depýtattary, qala halqy men jastar uıymdarynyń ókilderi qatysty.
«Búgingi mereke - erekshe mereke. Sebebi, bul bárimizge patrıottyq sezim syılaıdy. Ol sondaı-aq jas pen kárini, otanyn súıetin árbir azamatty birliktiretin mereke. Búgingi sharaǵa tek jastar emes, jasy úlken kisiler de qatysýda. Jalpy bul sharaǵa ár saladaǵy jastar, onyń ishinde volonterler, belsendi jastar, stýdentter, sportshylar, IT mamandary, jıyny myńnan astam jastar qatysýda. Búgingi merekege oraı bárimizdiń basymyz qosyldy», - dedi Almaty qalasy volonterler front ofısiniń jetekshisi Baǵdat Anarbaeva.
Qurmetti temirjolshy, derbes zeınetker Orynbek Shúıinshiálıev búgin kók týymyzdyń bıikke kóterilgenin kórip, qatty qýanǵanyn aıtty.
«Erekshe qýanysh ári maqtanysh sezimin keshtim. Bul is-sharaǵa jastardyń, stýdentterdiń, oqýshylardyń qatysqany óte durys. Búgingi saltanatty jıynǵa qatysyp otyrǵan jastardy men erteń ómirde óz jolyn tapqan, elimizdiń aıtýly azamattary bolady dep senemin. Al biz olarǵa bilmegenin úıretip, aqyl-keńes berýge árqashan daıynbyz», - dedi ol.
«Men óz halqymdy, onyń rámizderin jaqsy kóremin. Búgin bizdiń volonterler óz eliniń patrıoty retinde is-sharaǵa qatysty. Sharaǵa 130 volonter qatysty. Bul merekeni toılaýdyń maqsaty azamattardy, jastardy otansúıgishtikke baýlý dep oılaımyn. Ony men quptaımyn, sebebi, jastarymyz óz eli úshin úlken tabystarǵa jetip, halyqaralyq deńgeıde elimizdiń mereıin ústem etý úshin olarda patrıottyq sezimi bolǵany durys», - dedi Qazaqstan volonterlar lıgasy qoǵamdyq qorynyń Almaty qalasy boıynsha úılestirýshisi Larısa Andreevna.
Eske salaıyq, Almatyda Memlekettik rámizder kúni Shevchenko kóshesi boıymen M.Gandı atyndaǵy saıabaqtan Qonaev kóshesine deıin velojarys ótedi. Oǵan árkim qatysa alady. Márege jetken kezde QR Ánuranyn jappaı oryndaý uıymdastyrylady.
Keshke saǵat 19:30-da Abaı alańynda otandyq estrada juldyzdary, atap aıtqanda Jubanysh Jeksenuly, Dılnaz Ahmadıeva, Nurjan Kermenbaev, Gazızhan Shekerbekov, Marhaba Sábı, Araı Tribute, «Made in KZ» toby, Syrymtaı Eńsepov jáne Qazbek Quraıysh qatysatyn merekelik kontsert ótedi.
Kontsertten soń Qurmanǵazy atyndaǵy Qazaq ulttyq konservatorııasynyń stýdentteri men Jambyl atyndaǵy Memlekettik fılarmonııa horynyń jastar quramy QR memlekettik ánuranyn oryndaıdy.
