Almatyda «Memlekettik til - meniń tilim» atty saltanatty jıynda qazaq tilin damytý máseleleri talqylandy (FOTO)
Alqaly májilis bastalar aldynda oǵan jınalǵan zııaly qaýym ókilderi Halyqaralyq «Qazaq tili» qoǵamynda talaı jyl aıanbaı eńbek etken, qazaq tiliniń damýyna zor úles qosqan, taıaýda ǵana dúnıeden ozǵan qoǵam qaıratkeri, ádebıetshi, ǵalym Tursynbek Kákishuly men Astana qalalyq «Qazaq tili» qoǵamynyń jaýapty hatshysy bolǵan Murat Ábdirahmanovty bir mınýt únsizdikpen eske aldy. Osydan keıin, kirispe sózinde Halyqaralyq «Qazaq tili» qoǵamynyń prezıdenti, akademık Ómirzaq Aıtbaıuly búgingi jıyn Elbasynyń qazaq tiline qatysty bastamalarynan týyndap jatqan ıdeıalardy ári qaraı óristetý, olardy iske asyrýǵa múmkindik beretin naqty is-sharalardy qolǵa alý maqsatynda uıymdastyrylǵandyǵyn aıtty. «Maqsatymyz ózderińizben aqyldasa-keńese otyryp, memlekettik tilimizdiń órisin keńeıtetin, sapalyq damýyn qamtamasyz etetin, ortaq qundylyqtar men ortaq aqparattyq-mádenı keńistigimizdi qalyptastyratyn keshendi sharalardy birlese iske asyrý joldaryn qarastyrý, ortaq maqsat jolynda aqyl-oıymyz ben kúsh-jigerimizdi biriktirý», - dedi Ó. Aıtbaıuly. Sonymen qatar ol til máselesi jekelegen uıymdardyń sharýasy emes, búkil el bolyp, qoǵam bolyp jumyla kóteretin uly ıgi is ekendigin jetkizdi. «Memleketterdiń damý barysyna kóz júgirter bolsaq, kez-kelgen eldiń memlekettik tutastyǵyn qalyptastyrýǵa alǵyshart retinde qyzmet etetin tórt túrli dińgek bar, olar: til, tarıh, mádenıet jáne din. Osylardyń ishinde memlekettik tildiń orny erekshe. Óıtkeni til bir bolmaı, oı bir bolmaıdy. Oı bir bolmasa, ortaq maqsatqa qol jetkizý de múmkin emes», - dedi Ó. Aıtbaıuly. Sondaı-aq, búgingi jıynda qazaqtar shoǵyrlana qonystanǵan shet elderde jáne baýyrlas túrki memleketteriniń astanalarynda «Qazaq tilin úıretý ortalyqtary jelisin qurý týraly» memorandýmǵa qol qoıý rásimi bolady dep kútilýde. Memorandýmǵa memlekettik, memlekettik emes, aktsıonerlik, qoǵamdyq jáne jeke menshik mekeme, joǵary oqý orny, buqaralyq aqparat quraldary jáne basqa da uıymdar qatysa alady. Búgingi saltanatty is-sharaǵa halyqaralyq «Qazaq tili» qoǵamynyń tóralqa músheleri, QR Mádenıet jáne sport mınıstrligi men qala ákimdiginiń ókilderi, elimizdegi ulttyq-mádenı birlestikterdiń jetekshileri, ǵylymı-zertteý mekemeleriniń basshylary, joǵarǵy oqý oryndarynyń basshylary, ǵalymdar, qoǵam belsendileri, til janashyrlary qatysýda. «Memlekettik til meniń tilim» atty saltanatty jıyn odan ári jalǵasýda. Aıta ketelik, Qazaqstanda 1989 jyly 22 qyrkúıek kúni "Til týraly" zań qabyldanǵan bolatyn. Bul zańda Qazaq KSR-iniń memlekettik tili qazaq tili, al orys tili - ultaralyq til dep bekitildi. Sodan beri, elimizde jyl saıyn 22 qyrkúıek - Qazaqstan halyqtarynyń tilder merekesi kúni bolyp atap ótiledi.
