Almatyda memlekettik satyp alý máseleleri boıynsha komıssııa quryldy
Komıssııany qurýdaǵy maqsat - memlekettik satyp alýdaǵy jergilikti mazmun máselesi boıynsha memlekettik organdar men otandyq taýar óndirýshilerdiń ózara árekettestigin qamtamasyz etý.
Komıssııanyń birinshi otyrysy otandyq taýar óndirýshilerdiń densaýlyq saqtaý salasyna qatysý máselesin sheshýge arnaldy.
Bul sharaǵa memlekettik satyp alýdyń bas operatory retinde - Almaty qalalyq Densaýlyq saqtaý basqarmasy men oǵan vedomstvolyq baǵynyshtaǵy mekemelerdiń ókilderi jáne almatylyq taýar óndirýshiler qatysty.
Shara barysynda taraptar jeke medıtsınalyq klınıkalar men otandyq taýar óndirýshilerdiń memlekettik satyp alýǵa qatysý máseleleri, memlekettik satyp alýdy ótkizýdiń ashyqtyǵy jáne 2016 jyldyń jospary talqylandy.
Otyrys barysynda Densaýlyq saqtaý basqarmasy janynda Memlekettik-jeke menshik áriptestik, ınnovatsııalyq jáne daǵdarysqa qarsy damý máseleleri jóninde jumys organynyń qurylǵandyǵy belgili boldy.
Onyń qyzmeti taýarlar, jumystar jáne kórsetiletin qyzmetterdi memlekettik satyp alý barysynda qazaqstandyq mazmunnyń úles salmaǵyn arttyrýǵa baǵyttalatyn bolady.
Kezdesý qorytyndysy boıynsha taýarlardy, jumystardy jáne kórsetiletin qyzmetterdi memlekettik satyp alý barysynda qazaqstandyq mazmundy arttyrý boıynsha taýar óndirýshiler men medıtsınalyq mekemeler jáne jergilikti bılik arasynda ortaq kelisimge qol jetkizildi.
Odan basqa, bıylǵy jyldyń alǵashqy jartysynda komıssııa qurylys, energetıka, bilim jáne taǵy birqatar salalardaǵy memlekettik satyp alý máseleleri boıynsha osyndaı otyrystar ótkizetin bolady.
Aıta ketelik, Almatyda 2015 jyly medıtsınalyq qyzmet kórsetý naryǵynyń kólemi - 39,9 mlrd. teńgeni qurady. Búgingi tańda qalada 928 jeke medıtsınalyq mekeme jumys atqarady. Olardyń ishinde 16-sy - iri mekemeler.
Memlekettik satyp alýdyń basym bóligi osy salaǵa tıesili - 26 mlrd. teńge nemese 61 paıyzdy quraıdy. Al respýblıka boıynsha qazirgi tańda 91 farmatsevtıkalyq kásiporyn jumys atqarady. Olardyń ishinde 46 kásiporyn, ıaǵnı 50 paıyzdan astamy Almaty qalasynda ornalasqan.
