Almatyda Memlekettik rámizder kúni qalaı atalyp ótedi
ALMATY. QazAqparat - Almaty ákimdigi Memlekettik rámizder kúni qalada ótetin is-sharalar tizimin jarııalady, dep habarlaıdy QazAqparat tilshisi.
Almatyda QR Memlekettik rámizder kúnine oraı qalada túrli is-sharalar, onyń ishinde memlekettik týdy saltanatty túrde kóterý, jappaı Ánurandy oryndaý, velojarys, taqyryptyq kórmeler, dóńgelek ústelder jáne basqa da is-sharalardyń ótýi josparlanǵan.
Almaty ákimdiginiń málimetinshe, 4 maýsym kúni saǵat 11:00-de «Medeý» bıik taýly sport kesheniniń alańynda qala basshylyǵy, jastardyń qatysýymen Memlekettik týdy saltanatty túrde kóterý jáne Ánurandy jappaı oryndaý josparlanýda.
Sondaı-aq saǵat 11:00-de qalanyń barlyq aýdandarynda bir mezette Ánuran oryndalady.
Saǵat 12:00-de Shevchenko kóshesi boıymen M.Gandı atyndaǵy saıabaqtan Qonaev kóshesine deıin velojarys ótedi. Oǵan árkim qatysa alady. Jarysty bastamastan buryn barlyq qatysýshylarǵa jalaýshalar taratylady, márege jetken kezde QR ánuranyn jappaı oryndaý uıymdastyrylady.
Saǵat 19:30-da Abaı alańynda otandyq estrada juldyzdary, atap aıtqanda Jubanysh Jeksenuly, Dılnaz Ahmadıeva, Nurjan Kermenbaev, Gazızhan Shekerbekov, Marhaba Sábı, Araı Tribute, «Made in KZ» toby, Syrymtaı Eńsepov jáne Qazbek Quraıysh qatysatyn merekelik kontsert ótedi.
Kontsertten soń Qurmanǵazy atyndaǵy Qazaq ulttyq konservatorııasynyń stýdentteri men Jambyl atyndaǵy Memlekettik fılarmonııa horynyń jastar quramy QR memlekettik ánuranyn oryndaıdy.
Eske salsaq, Memlekettik rámizder kúni qarsańynda patrıottar forýmy ótetini jaıly jáne Astanada 600-den astam shara ótetini týraly habarlaǵan edik.
