Almatyda Memlekettik rámizder kúni atalyp ótti

ALMATY. QazAqparat - Almatydaǵy Joldasbekov atyndaǵy Stýdentter saraıynda Memlekettik rámizderdiń 27 jyldyǵyna arnalǵan saltanatty jıyn ótti, dep habarlaıdy QazAqparat tilshisi.

Elbasy N.Á.Nazarbaev 1992 jyldyń 4 maýsymynda Qazaqstan Respýblıkasynyń Týyn, Eltańbasyn jáne Ánuranyn bekitken edi.

Almaty ákimi Baýyrjan Baıbek Qazaqstannyń memlekettik rámizderi Otanǵa, el tarıhy men memlekettik tilge, mádenıet pen dástúrge degen shynaıy súıspenshiliktiń kórinisi ekenin atap ótti.

«Osydan 27 jyl buryn Almatynyń naq tórinde asa mańyzdy tarıhı oqıǵa - tuńǵysh ret memlekettik rámizder qabyldandy. Tý, Eltańba men Ánuran - halqymyzdyń armany men ańsarynyń, darhandyǵy men daralyǵynyń, áleýeti men múmkindiginiń jıyntyq kórinisi. Búgingi Qazaqstan - turaqty damyǵan, órken jaıǵan memleket. Sizder, táýelsiz Qazaqstannyń óskeleń urpaqtary tereń bilim, eren eńbek jáne ózara toptasý arqyly Otanymyzdy, bilim men ǵylymdy, ekonomıkany alǵa jyljytasyńdar. Elbasy bir sózinde «Biz táýelsizdikke ańsap, zaryǵyp jettik. Endi sol táýelsizdiktiń qasıetti belgilerin de erekshe qadirleýimiz, qasterleýimiz kerek. Árbir azamat Qazaqstannyń Týyn, Eltańbasyn, Ánuranyn tumardaı qasıet tutýy qajet. Eldigimizdiń synalatyn bir tusy - osy», - degen bolatyn. Tuńǵysh Prezıdentimizdiń osy naqyl sózin elimizdiń árbir azamaty júrek túkpirinde saqtap, árkez jadynda ustap, oryndaýy qajet. Barshańyzdy búgingi Qazaqstan Respýblıkasynyń memlekettik rámizderi kúnimen shyn júrekten quttyqtaımyn!», - dedi Baýyrjan Baıbek.

Saltanatty jıyn sońy Nurjan Kermenbaev, Kental, Monık, Saryn, Daýys International, Azııa toptary qatysqan merekelik kontsertke ulasty.