Almatyda memlekettik medıtsınalyq ortalyq satylymǵa shyǵaryldy

ALMATY. QazAqparat - Memlekettik múlikti jekeshelendirý sheńberinde Almatyda Aımaqtyq dıagnostıkalyq ortalyq pen Á.Qasteev mýzeıiniń janyndaǵy óner mektebi elektrondy tenderge shyǵaryldy, dep habarlaıdy QazAqparat tilshisi.

Aımaqtyq dıagnostıkalyq ortalyqtyń bastapqy baǵasy 4,5 mlrd teńgege baǵalanyp otyr. Satyp alýdyń basty sharty - kásiporynnyń múliktik keshen retindegi profılin saqtaý. Elektrondy tender 12 qyrkúıekke belgilendi.

Á.Qasteev atyndaǵy beıneleý óneri jáne tehnıkalyq dızaın mektebiniń quny 328 mln teńgege baǵalanǵan. Saýda 20 qyrkúıekte ótedi.

«Úsh jylǵa bólip tóleý qarastyrylǵan. Alǵashqy aldyn-ala jarna mólsheri satylǵan baǵanyń 15 paıyzynan kem bolmaýy tıis. Alǵashqy jarna satý-satyp alý kelisimsharty jasalǵan kúnnen bastap 30 kúntizbelik kún ishinde engizilýi tıis.

Keıingi tólemder barysynda áli tólenbegen somaǵa QR Ulttyq bankiniń qaıta qarjylandyrý resmı stavkasyna sáıkes paıyzdyq mólsherleme qosylady.

Jyljymaıtyn múlik jer teliminen bólek satylady.

Satyp alýshy jer teliminiń kadastrlyq (baǵalaý) qunyn QR Jer kodeksine saı bólek tóleıtin bolady», - delingen habarlandyrýda.

Satýshy - Almaty qalalyq Qarjy basqarmasy buǵan deıin de «Qaırat» fýtbol klýbyndaǵy ákimdiktiń 30 paıyzdyq úlesin saýdaǵa shyǵarǵan bolatyn. Alaıda, ony satyp alýǵa ynta bildirgender bolmaǵan soń saýda ótpedi.

Qazaqstanda elektrondyq tender 2016 jyldyń basynan beri qoldanysta. Munda ár qatysýshy óziniń baǵasyn elektrondyq konvertke júktep, reestrdiń arnaıy veb paraqshasyna tirkeıdi.