Almatyda «memlekettik qyzmetshi» jeke kásipkerden para alyp jatqanda ustaldy
ALMATY. QazAqparat - Almatyda Memlekettik kirister departamentiniń «qyzmetkeri» 50 000 teńge para alyp jatqan jerinde ustaldy, dep habarlaıdy QazAqparat tilshisi atalǵan departamenttiń baspasóz qyzmetine silteme jasaı otyryp.
Almaty qalasy boıynsha Memlekettik kirister departamenti Bostandyq aýdany boıynsha Іshki ister bólimi qyzmetkerlerimen birlese otyryp, ishki qaýipsizdik máselesi boıynsha júrgizgen jedel-izdestirý sharasy aıasynda jumyssyz turǵyndy qolǵa túsirdi. Ózin memlekettik kiris departamenti qyzmetkerimin dep tanystyrǵan kúdikti A. Baımoldanov «J» esimdi jeke kásipkerden 50 000 teńge para alyp jatqan jerinde ustaldy. Jeke kásipkerlerdiń qarjylyq saýatsyzdyǵyn paıdalanǵan A.Baımoldanov buǵan deıin de birneshe ret para alyp kelgen.
«Qazirgi ýaqytta atalǵan fakti boıynsha sotqa deıingi tergeý amaldary bastalyp, A.Baımoldanovtyń ózge qylmystarǵa qatystylyǵy anyqtalý ústinde», - delingen habarlamada.
Almaty qalasy boıynsha Memlekettik kirister departamenti atalǵan turǵynnyń aldaýyna túsip, alaıaq árekettiń qurbany bolǵan jandarǵa myna mekenjaı boıynsha habarlasýyn suraıdy: Almaty qalasy, Jibek Joly kóshesi 127 ǵımarat nemese 279-29-56 senim telefony sonymen qatar, Bostandyq aýdany boıynsha ІІB-niń 254-47-02 telefony.
Almaty qalasy boıynsha Memlekettik kirister departamentiniń habarlaýynsha, jemqorlyqqa qarsy turý maqsatynda qyzmetkerler arasynda turaqty túrde tekserý jumystaryn júrgizip turady.
«Sonyń negizinde, 16 qazan kúni Memlekettik kirister departamentiniń Jetisý aýdany boıynsha mamany zańdy tulǵadan qosymsha qun salyǵyn tirkeýge qatysty qabyldanbaǵan shara úshin 10 000 teńge para alý ústinde jeke kabınetinde ustaldy», delingen habarlamada.
