Almatyda Memlekettik kirister departamentiniń qyzmetkeri 10 jylǵa sottalýy múmkin
ALMATY. QazAqparat - Almatyda qalalyq Memlekettik kirister departamentiniń burynǵy aǵa ofıtseri Baýyrjan Oralǵazın men Jambyl oblystyq MKD ishki qaýipsizdik basqarmasynyń burynǵy aǵa tergeýshisi Ǵazız Júzbaevtyń isi boıynsha jaryssóz ótti, dep habarlaıdy QazAqparat tilshisi.
Prokýror olardy 3-ten 10 jylǵa deıin bas bostandyqtarynan aıyrýdy surady.
«Baýyrjan Oralǵazındi 10 jylǵa bas bostandyǵynan aıyrýdy jáne múlkin tárkileýdi, sonymen qatar ómir boıyna memlekettik qyzmetten shettetýdi suraımyn", - dedi jaryssóz barysynda prokýror Oksana Rýban.
Al Ǵazız Júzbaevqa memlekettik aıyptaýshy 3 jyl 11 aı 8 kún kóleminde bas bostandyǵynan aıyrýdy surady.
Sonymen qatar, sot otyrysynda prokýror eks-ofıtser Baýyrjan Oralǵazınge taǵylǵan 9 baptyń 4-eýin alyp tastaýdy surady. Oralǵazın kinásiz tulǵany qylmystyq jaýapkershilikke tartyp, asa iri kólemde para berýge májbúrlep, alaıaqtyq jasady dep aıyptalyp otyr.
Júzbaevtyń isi boıynsha 4 baptyń 2-eýi alynyp tastaldy. Eks-tergeýshiniń áreketin memlekettik aıyptaýshy qylmystyq sot óndirisi kezinde aıǵaqtardy burmalaý, alaıaqtyq jasaý dep baǵalady.
Jaryssóz barysynda qorǵaýshylar sottalýshylardy aqtaýdy surady.
Іs materıaldaryna sáıkes, Oralǵazın jeke kásipker - Qyrǵyzstan azamatyna qatysty birqatar qylmys jasaǵan. Atap aıtqanda, ony laýazymdy tulǵalarǵa para berdi dep, halyqaralyq izdeýge jarııalaǵan. Májbúrlep túsinikteme bergizip, laýazymdy tulǵaǵa 120 000 AQSh dollary kóleminde para berýge ıtermelegen. Bul somany Oralǵazın óz maqsatynda paıdalanǵany anyqtalǵan.
Júzbaev bolsa Oralǵazınmen birige otyryp birqatar qylmys jasap, jábirlenýshini 20 000 AQSh dollary kóleminde para berýge májbúrlegeni anyqtaldy.
