Almatyda Memlekettik hattama týraly elimizdegi alǵashqy eńbektiń tanystyrylymy boldy
ALMATY. 6 jeltoqsan. QazAqparat /Erbol Turymbetov/ - Búgin ál-Farabı atyndaǵy Qazaq ulttyq ýnıversıteti stýdentterine «Bolashaq» halyqaralyq stıpendııasy stıpendıattar qaýymdastyǵynyń tóraǵasy, QR Prezıdenti Ákimshiligi basshysynyń orynbasary Baýyrjan Baıbek «Qazaqstan Respýblıkasynyń Memlekettik Protokoly» aktilik dárisin oqydy.
Kezdesýdi QazUÝ rektory Ǵalymqaıyr Mutanov ashty. B. Baıbek «Qazaqstan Respýblıkasynyń Memlekettik Protokoly» kitabynyń elimizdegi Memlekettik hattama jónindegi tuńǵysh eńbek ekenin atap ótti. «Reseıde Memlekettik hattamaǵa qatysty 17 eńbek jaryq kórgen. Al Qazaqstanda bundaı kitap birinshi ret shyǵyp otyr. Bul eńbekte basty 2 maqsat kózdelgen: Memlekettik hattama tarıhy jáne onyń damýy. Búginde Qazaqstan kóptegen halyqaralyq deńgeıdegi is-sharalardyń ótkizilý orny bolyp tabylady. Sonyń biri jaqynda ǵana ótken EQYU sammıti. Osyndaı sharalardyń barlyǵyn ótkizýde hattamanyń mańyzy óte zor», deıdi.
Atalǵan kitapta elimizdiń dıplomatııalyq protokolynyń damý tarıhy keshendi túrde qarastyrylǵan. Qazaq bıleýshileriniń ordalaryndaǵy rásimder sıpattalyp, rásimderdiń keıbir normalarynyń qalyptasyp, tamyrlanýyna áser etken faktorlar taldanǵan.
Kitaptyń birinshi bólimi tolyq memlekettik tilde jazylǵan. Zertteýdiń aıtarlyqtaı bóligi Qazaqstan Respýblıkasynyń Memlekettik protokolynyń qalyptasýy men onyń bolashaqtaǵy damý baǵyttaryna arnalǵan. Sondaı-aq, bul eńbekte oqyrmandar Qazaqstan Respýblıkasy Prezıdenti Protokolynyń qyzmetimen tanysa alady.
Kezdesý sońynda ýnıversıtet rektory Ǵalymqaıyr Mutanov Baýyrjan Qydyrǵalıulyna estelik syılyqtar tartý etti. Al QazUÝ qonaǵy ýnıversıtettiń úzdik stýdentterine óz kitaptaryn syılady.
