Almatyda memlekettik balabaqshalarda tólem 15 myń teńgege deıin tómendetildi
ASTANA. QazAqparat - Almaty ákimdigi memlekettik balabaqshalarda tólemdi 15 myń teńgege deıin tómendetýdi sheshti. Bul týraly búgin Ortalyq kommýnıkatsııalar qyzmetindegi baspasóz máslıhatynda Almaty ákimi Baýyrjan Baıbek málim etti.
«Almatyda tarıhı qalyptasqan jaǵdaı boıynsha 5-6 jastaǵy balalar úshin memleket tóleıdi, 3-5 jastaǵylarǵa ata-analar kommertsııalyq talaptarmen tolyqtaı tóleıdi. Búginde aılyq eseptik kórsetkish artty. Ata-analar 27 myń teńge tóleýde, alaıda shyn máninde balabaqshada bir oryn 38 myń teńge turady. Búginde ata-analar ózderiniń balalaryn balabaqshalardan shyǵaryp alyp jatqanyn baıqaýdamyz», - dedi ákim.
Onyń sózine qaraǵanda, bul másele ákimdikte tyńǵylyqty talqylanyp, osy baǵytta jergilikti bıýdjetten 3 mlrd. teńge bólindi.
«Osy oraıda ata-analar ortasha alǵanda 15 myń teńge tóleıdi, ıaǵnı shamamen 20 myń teńge kóleminde únemdeý bolady. Bul turǵyda 17 myń bala qamtylady. Meniń oıymsha, halyqtyń áleýmettik álsiz toptaryna tıisti qoldaý jasalady», - dedi ol.
Taratylǵan málimetterge qaraǵanda, byltyr qalada 4900 oryndyq 52 balabaqsha tapsyrylǵan kórinedi, onyń ishinde 17-si memlekettik bıýdjetten, 34-i jeke qarjy jáne bireýi memlekettik-jekemenshik seriktestik esebinen salyndy.
