Almatyda memlekettik baǵdarlama boıynsha basylyp shyqqan kitaptardyń tusaýkeseri bolyp ótti
ALMATY. 6 Jeltoqsan. QazAqparat /Názıra Eleýhan/- Búgin Almaty qalasynyń Tilderdi damytý basqarmasy Qazaqstan Respýblıkasynyń Tilderdi qoldaný men damytýdyń 2001-2010 jyldarǵa arnalǵan memlekettik baǵdarlamasy boıynsha 2010 jyly shyǵarylǵan baspa jáne elektrondy ónimderdiń tusaýkeserin ótkizdi.
Tusaýkeserge Almaty qalasy aýdandyq ákimdikteriniń bilim bólimderiniń bastyqtary, kitaphana basshylary, halyqqa qyzmet kórsetý ortalyqtarynyń mamandary qatysty.
Sharanyń maqsaty - 2010 jyly jaryq kórgen balalarǵa arnalǵan aýdıokitaptarmen, anımatsııalyq fılmdermen, resmı is qaǵazdarynyń memlekettik tildegi úlgilerimen, elektrondy nusqalarymen, salalar boıynsha termındik sózdiktermen, tildeskishtermen tanystyrý bolyp tabylady.
Jıyn barysynda Almaty qalasy Tilderdi damytý basqarmasynyń tapsyrysymen jasalǵan, árqaısysy 16 saǵattyq «Asyl sóz», «Shákirtterge shashý» atty qazaq ádebıetiniń úzdik úlgilerinen quralǵan aýdıokitaptar tanystyryldy. «Bul aýdıokitaptar mektep oqýshylarynyń suranysyn qanaǵattandyrý maqsatynda jaryq kórdi»,-dep atap ótti Tilderdi damytý basqarmasynyń bastyǵy Ahetov Mamaı. Tusaýkeserde sonymen qatar, kásibı salalar boıynsha jaryq kórgen termındik sózdikter men tildeskishter, is qujattarynyń úlgileri engizilgen kitaptar, sondaı-aq 30 serııadan turatyn «Aldar Kóseniń kóńildi oqıǵalary» atty anımatsııalyq mýltfılm kópshilik nazaryna usynyldy. «Asyl sóz», «Shákirtterge shashý» aýdıokitaptaryna qazaq folklorynyń kónermes týyndylary, aıtýly qalamgerlerdiń ýaqyt synynan ótken sarabdal shyǵarmalary suryptalyp jazylǵan. Kitaptar balanyń jas ereksheligine, uǵymyna saı keletindeı jasalǵan.
«Tárbıelik máni zor bul týyndylar jetkinshekter zerdesiniń oı-óristerin damytyp, sóıleý mádenıetin qalyptastyrýǵa yqpal eteri sózsiz. Al, el aýzyndaǵy ańyz-áńgimelerdiń sıýjetteri boıynsha jasalǵan «Aldar Kóseniń kóńildi oqıǵalary» anımatsııalyq mýltfılmi áserli de oınaqy oqıǵalarymen balalar kóńilin birden baýrap alatynyna senimdimin»,- dedi Almaty qalasynyń Іshki saıasat Basqarmasynyń bastyǵy Kenjehan Slıamjan.
«Respýblıkamyzda tuńǵysh ret 3D-formatyndaǵy grafıkalyq tásilmen jasalǵan anımatsııalyq mýltfılmniń basty ereksheligi - onyń ulttyq qundylyqtardy nasıhattaýynda. Sońǵy zamanaýı tehnıkalyq quraldardyń múmkinshiligimen jasalǵan mýltfılmniń búldirshinderge memlekettik tildi úıretýde, til ustartýda yqpaly aıryqsha bolady», -dedi Tilderdi damytý basqarmasynyń bastyǵy Ahetov Mamaı. Onyń aıtýynsha erteńnen bastap atalmysh kitaptar qalanyń barlyq kitaphana men bala-baqshalaryna tegin taratylatyn bolady.
Ol sonymen qatar, tanystyrylym barysynda qoǵamda tilge degen kózqaras ózgerdi dep atap ótti. «Memlekettik til saıasatyn iske asyrýdaǵy nátıje kún saıyn qazaq tilin qoldanýshylar men úırenýshiler sanynyń artyp kele jatqandyǵyn kórsetip otyr. Sonymen qatar, qazaq tiline degen oqýlyqtar men kórkem ádebıetke, sondaı-aq salalyq qyzmetkerlerge arnalǵan tildeskishterge degen suranystar artyp kele jatyr», -dep atap ótti.
Onyń aıtýynsha kásibı salalar boıynsha jaryq kórgen termındik sózdikter men tildeskishter, is qujattarynyń úlgileri memlekettik mekemeler men uıymdarǵa ádistemelik kómek retinde berilmek. «Ústimizdegi jyly bilim, aýylsharýashylyǵy, tótenshe jaǵdaılar, jer qatynasy, sáýlet jáne qurylys salasy qyzmetkerlerine arnalǵan tildeskishter jaryq kórdi. Sondaı-aq, saqtandyrý, sport jáne týrızm, zań jáne quqyq, aqparattyq júıe, bilim berý salalaryna arnalǵan oryssha-qazaqsha termınologııalyq sózdikter, ishki ister, jolaýshylar kóligi jáne avtomobıl joldary, quqyq jáne quqyqtaný, turǵyn úı jáne jer qatynastary, energetıka jáne kommýnaldyq sharýashylyǵy salalary boıynsha is qaǵazdarynyń úlgileri daıyndaldy. Ár salaǵa qatysty bazalyq termınder men ataýlardyń, sóz tirkesteriniń, kásibı uǵymdardyń oryssha-qazaqsha túsindirmesi júıeli túrde beriletindikten, atalmysh basylymdardyń memlekettik tildi oqyp-úırenýde, kásibı biliktilikti arttyrýda kómegi zor bolatynyna senemin»,-dedi ol.
