Almatyda memleket jáne qoǵam qaıratkeri, ǵalym Ó. Joldasbekovtiń 85 jyldyǵy atap ótildi

Ýnıversıtet rektory, tehnıka ǵylymdarynyń doktory Ǵalymqaıyr Mutanov bastaǵan joǵary oqý ornynyń basshylyǵy, QR UǴA prezıdenti Murat Jurynov, sondaı-aq, ár túrli salada eńbek etetin ǵalymdar, Ómirbek Joldasbekovtiń otbasy músheleri, kezinde birge jumys istegen áriptesteri, dos-jarandary, shákirtteri jáne stýdentter aldymen ýnıversıtet aldyndaǵy Ómirbek Joldasbekovtiń eskertkishi aldyna jınalyp, oǵan gúl shoqtaryn qoıdy.

Osy jerge jınalǵan qaýym aldynda sóılegen sózinde Ǵ. Mutanov ýnıversıtette búgingi tańda júzege asyrylyp jatqan túrli jobalardyń kezinde Ó. Joldasbekov bastap ketken ıgi isterdiń zańdy jalǵasy ekendigin atap ótti.

«Otanymyzdyń damýyna qyrýar eńbek sińirgen tulǵalarymyzdy qashanda ardaqtap, eńbekterin baǵalap, eske alyp júretin bolsaq, urpaǵymyz durys baǵytta damıtyn bolady. Ómirbek Joldasbekov ǵylym men qoǵamdyq jumystardy qatar alyp júrgen kórnekti tulǵa edi. Ol Qazaq ulttyq ýnıversıteti qalashyǵynyń negizin qalap, ony álemdik deńgeıge kóterip ketti. Ómekeńniń ǵylymı mektebi qazirgi tańda da jemisti eńbek etip keledi. Al ómir joly, sińirgen eńbekteri búgingi urpaqqa qashanda úlgi», - dedi Ǵ. Mutanov.

Budan keıin, QR UǴA prezıdenti Murat Jurynov pen zań ǵylymdarynyń doktory Sultan Sartaev sóz sóılep, Ó. Joldasbekovtiń ómiri men qyzmetine toqtaldy.

Sodan soń, jınalǵan qaýym Mehanıka-matematıka fakýlteti ǵımaratynda Ó. Joldasbekov atyndaǵy dárishana zalynyń ashylý saltanatyna qatysty. Qyzyl lentany ýnıversıtet rektory Ǵ. Mutanov pen QR UǴA prezıdenti, akademık M. Jurynov kesti.

Osy úlken zalda ótken májiliste Ó. Joldasbekovtiń ómiri men qyzmetine arnalǵan derekti fılm kórsetilip, baıandamalar oqyldy. Kezinde Ó. Joldasbekovpen qanattasa eńbek etken ǵalymdar ol týraly estelikter aıtty.