Almatyda memleket menshigindegi páter zańsyz satylyp ketken

ALMATY. QazAqparat - Almaty prokýratýrasy Medeý aýdanynda sot sheshimderiniń oryndalýyn monıtorıngileý barysynda birqatar zańbuzýshylyqtardy anyqtady, dep habarlaıdy QazAqparat tilshisi.

Qalalyq prokýratýranyń baspasóz qyzmetiniń habarlaýynsha, tárkilengen 36 páterdiń memleket kirisine alynbaǵandyǵy belgili boldy.

Prokýrorlyq shara qoldaný aktileri boıynsha jalpy  quny 1,5 mıllıard teńge bolatyn nysandar balansqa qabyldandy jáne kommýnaldyq turǵyn úı qoryna alyndy.

Sondaı-aq, 2 páter aýktsıon arqyly satylyp, bıýdjetke 205 mıllıon tenge tústi.

Tekserý barysynda memleket paıdasyna tárkilengen páterdiń qaıta zańsyz satylǵany anyqtaldy.

Bul zańsyz mámilede satý barysynda sottalǵan er adamnyń tyıymdy alyp tastaý boıynsha ádilet salasynda qyzmet isteıtin aǵasy jáne birqatar deldaldardyń qatysynyń barlyǵy anyqtaldy.

Bul derek boıynsha qylmystyq is qozǵalyp, kináli tulǵalar qamaýǵa alyndy.

Memleket múddesin qorǵaý maqsatynda aýdan prokýratýrasy páterlerdi satý-satyp alý sharttaryn jaramsyz dep tanyp, shartty buzý týraly talap engizdi. Medeý aýdandyq soty talaptardy qanaǵattandyrdy. Sot mámileni jaramsyz dep tanydy.
Qazirgi ýaqytta, Almaty qalalyq turǵyn úı jáne turǵyn ınspektsııasy basqarmasynyń atyna páterlerdi Almaty qalasy kommýnaldyq turǵyn úı qoryna alý týraly hat joldandy.