Almatyda mektepteriniń birinde «Salaýatty mektepter - zerdeli sheshimder» baǵdarlamasy aıasynda jaryqtandyrý júıesi keshendi túrde qaıta jabdyqtaldy
ALMATY. 19 mamyr. QazAqparat /Názıra Eleýhan/ -Almatyda Qazaqstan - Philips kompanııasy jahandyq «Salaýatty mektepter - zerdeli sheshimder» atty saýyqtyrý-bilim berý baǵdarlamasy aıasynda Almaty qalasyndaǵy №63 jalpy orta bilim berý mektebinde jaryqtandyrý júıesin keshendi túrde qaıta jabdyqtady.
Atalmysh baǵdarlama boıynsha iske asqan joba Philips kompanııasynyń Qazaqstandaǵy alǵashqy áleýmettik jobalarynyń biri bolyp tabylady.
Baǵdarlama aıasynda kompanııa mekteptegi barlyq synyptarǵa (42 synypqa) óziniń qarjysy esebinen, tegin tozǵan jaryq berýshi qural-jabdyqtardy Philips-tiń energııa tıimdi jańa shamdary men shyraqtaryna aýystyrǵan. Atalǵan mekteptegi jaryqtandyrý tehnıkasy 35 jyldan astam ýaqyttan beri jańartylmaı kelgen. №63 jalpy orta bilim berý mektebinde oqıtyndar negizinen halyqtyń áleýmettik turǵydan álsiz qorǵalǵan toptarynan shyqqan balalar, sonyń ishinde mekteptiń janynda ornalasqan №2 balalar úıiniń tárbıelenýshileri.
Atalmysh mekteptiń pedıatry men ustazdar qaýymynyń aıtýynsha, mekteptegi jańa jaryqtandyrý oqýshylardyń zeıini men oqý úlgerimin arttyryp, edáýir jaqsarýyna yqpal etken.
«Negizinen bul baǵdarlamany Philips kompanııasy álemniń 38 elinde iske asyrýda. 2010 jyly bul baǵdarlama 667 mektepte iske asyryldy. Aldaǵy ýaqytta kompanııa Astanadaǵy mektepterdiń birine jaryqtandyrý júıesin keshendi túrde qaıta jabdyqtamaq, qazirgi ýaqytta osy is boıynsha kelisimder júrgizilýde. Bul Almatydaǵy ilki jobany iske asyrýǵa shamamen aıtqanda 20 myń eýro jumsaldy», - dedi Philips kompanııasynyń Qazaqstandaǵy korporatıvti kommýnıkatsııalary jónindegi mamany Aleksandra Shpakova. Onyń aıtýynsha aldaǵy ýaqytta «Salaýatty mektepter - zerdeli sheshimder» baǵdarlamasynyń aýqymy men bıýdjeti ulǵaımaq.
«Biz Philips kompanııasyna jáne aýdandyq bilim departamentine dál bizdiń mektebimizde osy áleýmettik jobany júzege asyrý múmkindigin usynǵany úshin alǵysymyzdy bildirimiz. Biz oqytý jaǵdaılaryn edáýir jaqsartyp qana qoımaı, sondaı-aq, elektr qýatyna ketetin shyǵyndardy edáýir tómendetýge múmkindik aldyq. Onyń dáleli retinde qorytyndy aýdıt nátıjelerin ataýǵa bolady, onyń nátıjeleri kórsetkendeı, synyptardyń jaryqtandyrylý sapasy men deńgeıi 80%-ǵa artyp, al qural-jabdyqtardy ornatý kúninen bastap elektr qýatyn únemdeý 17%-dy qurady», - dep atap ótti №63 jalpy orta bilim berý mektep dırektory Baqyt Qosaeva.
Philips kompanııasynyń ókili Aleksandra Shegaıdyń aıtýynsha, «Salaýatty mektepter - zerdeli sheshimder» atty saýyqtyrý-bilim berý baǵdarlamasy oqýshylar boıynda tabıǵat qorlaryn paıdalaný jáne qorshaǵan ortany qorǵaýǵa jaýapkershilikpen qaraý sekildi qasıetterdi qalyptastyrýdy maqsat tutady.
