Almatyda «Mektepke qaýipsiz barý! Úıge qaýipsiz kelý!» aktsııasy ótti (FOTO)
«Qazaqstanda jańa oqý jyly bastalǵaly beri joldarda kólik júktemesi edáýir artyp ketti. Almatyda kólik óte kóp. Sondyqtan da kún saıyn ondaǵan jol-kólik oqıǵasy tirkeledi. Ókinishke qaraı, mektep oqýshylary osyndaı oqıǵalardyń jıi qurbany bolyp jatady. Munyń basty sebepteri - mektep oqýshylarynyń jol qozǵalysy erejesin bilmeýi jáne júrgizýshilerdiń sol erejelerdi eleń qylmaýy men zeıinsizdigi. Osyǵan baılanysty, Qazaqstannyń Qyzyl Jarty aı Qoǵamy búgingi sharany uıymdastyrdy. Oǵan qalanyń birqatar mektepteriniń oqýshylary men bizdiń qoǵamnyń eriktileri qatysty. Búgingi sharanyń basty maqsaty - oqýshylardy jol qozǵalysy erejesin saqtaýǵa baýlý jáne jolda júrý mádenıetin boılaryna sińirý», - dedi QR Qyzyl Jarty aı qoǵamynyń qyzmetkeri Roman Chýrılov.
Aktsııa barysynda volonterler mektep oqýshylarymen birge jol qozǵalysy erejelerin este saqtaýǵa baǵyttalǵan tájirıbelik jattyǵýlar jasady. Búgingi sharaǵa qatysqan mektep muǵalimderiniń aıtýynsha, bul jattyǵýlardyń paıdasy óte zor.
Sonymen qatar, búgin «Ortaq jol» jol qozǵalysy qaýipsizdigi qaýymdastyǵy belgili shoýmen Murat Mutyrǵanovpen birge Abylaı han dańǵyly men Jibek joly kóshesi boıynda arnaıy reıd júrgizdi.
Bul ýchaskelerde eki saǵat ishinde júzden asa ereje buzýshylyq áreketter tirkeldi.
«Búgin biz Qyzyl Jarty aı qoǵamymen birlesip, joldy belgilenbegen jerden kesip ótken júrginshiler arasynda túsindirý jumystaryn júrgizdik. Mysaly, Abylaı han dańǵyly men Jibek joly kóshesiniń qıylysynda jerasty ótkeli bar.
Alaıda, kóp adam ony eleń qylmaıdy. Sondyqtan, olar kóńil bólip, tek belgilengen jermen júrýleri úshin, biz jol qıylysyna jáne júrginshiler júretin ótkelderdiń qasyna arnaıy qýyrshaq ornalastyrdyq. Ol «Madagaskar» mýltfılminiń keıipkeri. Bizdiń maqsatymyz - adamdardy jol qozǵalysy erejesin saqtaýǵa shaqyrý», - dedi atalmysh qaýymdastyqtyń prezıdenti Arsen Shaqýov.
Uıymdastyrýshylar mundaı sharalardy jıi ótkizip turýǵa ýáde berdi.
