Almatyda mektepke deıingi bilim berý mekemeleri mamandarynyń biliktiligin arttyrýǵa arnalǵan semınar ótýde
ALMATY. 17 mamyr. QazAqparat /Ádilet Musahaev/ - Almatydaǵy «Bóbek» ulttyq ǵylymı-tájirıbelik, bilim berý jáne saýyqtyrý ortalyǵynda «Mektepke deıingi bilim berý uıymdarynda «Ózin-ózi taný» rýhanı-adamgershilik bilim berýdiń ǵylymı-teorııalyq jáne ádistemelik negizderi» atty aptalyq kýrsy ótip jatyr.
Mamyrdyń 16-27 aralyǵynda jalǵasatyn bul is-shara mektepke deıingi bilim berý mekemelerinde jumys isteıtin pedagogter men psıhologtardyń kásibı biliktiligin arttyrý maqsatynda uıymdastyrylýda.
QR bilim berý salasyn damytý jáne jetildirý jolynda elimizdiń Birinshi hanymy Sara Alpysqyzynyń «Ózin-ózi taný» jobasy 2010 jyldyń 1 qyrkúıeginen bastap bilim berýdiń barlyq deńgeılerinde pán esebinde engen bolatyn. Derekterge súıensek, «Ózin-ózi taný» rýhanı-adamgershilik bilim berý baǵdarlamasy 2001-2009 jyldar aralyǵynda eksperımentaldy joba túrinde jan-jaqty zerttelip, baıqaýdan ótken. Jańadan engizilgen pánniń maqsaty men talaptaryn túsindirý, «Ózin-ózi taný» baǵdaralamasymen jaqyn tanysý jáne onymen jumys isteıtin muǵalimderdiń biliktiligin arttyrý maqsatynda arnaıy semınarlar 2010 jyldan bastap ótkizilip keledi.
Semınarǵa respýblıkanyń ár aımaǵynan 100-ge jýyq adam qatysýda. Olardyń basym bóligi Batys Qazaqstan, Soltústik Qazaqstan, Ońtústik Qazaqstan, Shyǵys Qazaqstan, Qaraǵandy, Almaty, Mańǵystaý, Jambyl oblystary men Almaty qalasynyń bilim berý qyzmetkerleri.
«Bóbek» ulttyq ǵylymı-praktıkalyq, bilim berý jáne saýyqtyrý ortalyǵyna qarasty Adamnyń úılesimdi damýy ınstıtýty dırektorynyń orynbasary, pedagogıka ǵylymdarynyń kandıdaty Botagóz Qudysheva semınar aıasynda «Ózin-ózi taný» rýhanı-adamgershilik bilim berýdiń múmkindikteri men bolashaǵy» taqyrybynda sheberlik dárisin ótkizdi.
«Búgingi tańda bilim berý salasyna qoıylyp otyrǵan talaptar joǵary. Jyl saıyn elimizdiń bilim júıesine ózgerister men tolyqtyrýlar engizilip turady. «Ózin-ózi taný» rýhanı-adamgershilik bilim berý baǵdarlamasynyń bir ereksheligi oqytýshy men oqytatyn balanyń birlesip jumys isteýine jańa múmkindikter berýinde», - deıdi Botagóz Qudysheva.
Sondaı-aq ol baǵdarlama balany materıaldyq jaǵynan qamtamasyz etip qana qoımaı, rýhanı-adamgershilik normalarǵa jaýap beretin tolyqqandy tulǵa bolyp qalyptasýyna baǵyttalǵandyǵyn aıtady. «2001-2009 jyldary júrgizilgen eksperımentter nátıjesinde pedagogterdiń bilimi men biliktiligin arttyryp, balalar men jasóspirimder arasynda adamgershilikke baýlıtyn is-sharalardy uıymdastyrý, ulttyq dástúrdi jańǵyrta otyryp, bala tárbıesine shyǵarmashylyq kózqaraspen qaraý kerek ekendigi anyqtaldy. Semınarda biz pedagogterge mańyzdy degen aqparattardy berýmen qatar, olardy ortalyqpen birlesip jumys isteýge shaqyramyz, - dep atap ótti óz sózinde B. Qudysheva.
Aldaǵy ýaqytta atalǵan kýrs aıasynda biliktilikti arttyrý trenıngteri ótkizilip, «Bóbek» Ulttyq ortalyǵyna qarasty qurylymdyq mekemelerge, sonyń ishinde observatorııaǵa ekskýrsııalar uıymdastyrylmaq.
