Almatyda mektep pen kolledjde psıhologııalyq qyzmet pen medıtsına kabınettiniń jumysy kúsheıtiledi
ALMATY. QazAqparat - Almaty qalasy ákiminiń orynbasary Erjan Babaqumarov onlaın formatta kámeletke tolmaǵandarmen jumys boıynsha jedel áreket etý shtabynyń otyrysyn ótkizdi, dep habarlaıdy QazAqparat tilshisi.
Otyrysqa orta jáne kásiptik bilim berý uıymdarynyń basshylary, úkimettik emes uıymdarynyń ókilderi men bilim jáne psıhologııa salasynyń sarapshylary qatysty.
Shtab otyrysynyń negizgi mindeti – kámeletke tolmaǵandar arasyndaǵy devıantty minez-qulyqtyń aldyn alý ádisterin jetildirý. Bul qıyn ómirlik jaǵdaıdaǵy kámeletke tolmaǵandarǵa áleýmettik-psıhologııalyq qoldaý jasaý jáne qoldaý sharalaryn qamtamasyz etý úshin qajet.
Shtab músheleri qalada oryn alǵan daǵdarystyq jaǵdaılardy qarastyrdy jáne jalǵasyp jatqan pandemııany eskere otyryp, kámeletke tolmaǵandardyń emotsıonaldy kóńil-kúıi men mazasyzdyq deńgeıin dıagnostıkalaý boıynsha kóp deńgeıli jumys josparyn talqylady.
Otyrys barysynda Almaty qalasy ıývenaldy polıtsııa bóliminiń bastyǵy J. Shonjanova, bilim berýdegi jańa tehnologııalardyń ǵylymı-ádistemelik ortalyǵynyń psıhologııalyq qamtamasyz etý bóliminiń basshysy E. Alıeva, «Bilim Foundation» QQ aımaqtyq fılıalynyń basshysy V. Kokanova, sondaı-aq psıhıkalyq densaýlyq ortalyǵynyń ókilderi sóz sóıledi.
Sonymen qatar, bilim berýdiń dástúrli formatyna oralý aıasynda oqýshylardyń emotsıonaldyq jaǵdaıyn taldaýdy kúsheıtý jáne «táýekel toptaryn» anyqtaý, sondaı-aq ata-analarmen ózara árekettestikti kúsheıtý boıynsha saraptamalyq pikirler tyńdaldy.
Sondaı-aq oflaın rejımde oqýǵa qolaıly jaǵdaı jasaý úshin qaýipsizdik sharalaryn, onyń ishinde epıdemıologııalyq sharalardy saqtaýdyń mańyzdylyǵyna nazar aýdaryldy.
Ákimniń orynbasary Erjan Babaqumarov pandemııanyń kámeletke tolmaǵandardyń psıhologııalyq jaǵdaıyna keri áserin eskere otyryp, bilim berý mekemeleriniń psıhologııalyq qyzmeti jumysynyń biryńǵaı qalalyq algorıtmi men ádistemesin ázirleýdi tapsyrdy.
Psıhologııalyq qyzmettiń tıimdiligin jáne medıtsınalyq kabınetterdiń jumysyn jaqsartý boıynsha qosymsha sharalardy ázirleý tapsyryldy. 2022 jyldan bastap mektepter men kolledjderdegi krızısti oqıǵalardyń sany mektep ákimshiligi men aýdandyq bilim bóliminiń sapalyq kórsetkishine aınalady.
Búginde Almaty qalasyndaǵy 207 mektepte 360 joǵary bilimdi psıholog jumys isteıdi. Mektep psıhologtary úshin biliktilikti arttyrý kýrstary uıymdastyrylady.
2020 jyly 153 psıholog kýrstardan ótti. Ómirlik qıyn jaǵdaıǵa nemese emotsıonaldy aýytqýshylyqqa tap bolǵan adamdar úshin 376-56-60, 116-16 nómirleri boıynsha Almaty qalasynyń biryńǵaı baılanys ortalyǵymen biriktirilgen krızıs jaǵdaıyndaǵy senim telefony jumys isteıdi.
Sonymen qatar, balalar men jasóspirimderge arnalǵan 150 nómiri boıynsha senim telefony jumys isteıdi.
