Almatyda mektep oqýshylarynyń basketboldan qalalyq birinshiligi bastaldy
ALMATY. 18 jeltoqsan. QazAqparat /Erbol Turymbetov/ - Búgin Jánııa Áýbákirovanyń avtorlyq mektebi zalynda «QKM Mektep Lıgasy» atty basketboldan Almaty qalalyq birinshiliginiń ashylý rásimi bolyp ótti.
Oǵan qaladaǵy 13 mekteptiń 5-6 jáne 7-8 synyp ul-qyzdarynan quralǵan 20 komanda qatysady. Ulttyq basketbol qaýymdastyǵymen birlese uıymdastyryp otyrǵan «Qazyna Kapıtal Menedjment» kompanııasy osy sharanyń demeýshisi bolyp otyr. Al jobaǵa «Lıter», «Alash aınasy» jáne «Drýjnye rebıata» basylymdary aqparattyq qoldaý kórsetýde.
Jalpy saıysqa qatysýshylar sany 240 adam. Búgin bastalǵan qalalyq jarys keler jyldyń mamyryna deıin jalǵasady. Bul ýaqyt aralyǵynda 173 oıyn ótkizý josparlanǵan. Jarys barysynda ár juma kúni irikteý týrlary ótkiziledi. Al jalpy saıys barysy www.sbasketball.kz saıtynda turaqty jarııalanyp turatyn bolady.
Búgingi ashylý saltanatynda jobanyń barlyq qatysýshylaryna sporttyq kıimder men basketbol doptary syıǵa berildi. Resmı ashylýynan soń №87 orta mektep pen №35 gımnazııa komandalary alǵashqy oıyndy bastap ketti.
