Almatyda mektep oqýshylaryna oqýlyq satyp alý úshin 3,2 mlrd teńge bólindi

ALMATY. QazAqparat – Almatyda mektep oqýlyqtaryn satyp alý úshin 3 mıllıard teńgeden asa qarjy bólindi. Bul týraly óńirlik kommýnıkatsııalar qyzmetiniń brıfıngisinde qalalyq bilim basqarmasynyń basshysy Lázzat Jylqybaeva aıtty, dep habarlaıdy QazAqparat tilshisi.

Spıkerdiń sózinshe, jergilikti bıýdjetten oqýlyqtar men kórkem ádebıetti satyp alýǵa 3,2 mlrd astam teńge bólindi.

«Bıyl oqýlyqtar men kórkem ádebıetterdi satyp alýǵa 3,2 mlrd astam teńgege qarjylandyrý kózdelgen. Búgingi tańda 11 baspamen 2 mlrd teńgege sharttar jasaldy. Oqýlyqtardy jetkizý boıynsha konkýrstyq rásimder aıaqtaldy. Sonymen qatar, barlyq 214 memlekettik mektep úshin elektrondy oqýlyqtarǵa jazylý jalǵasady», - dep atap ótti ol.

2023-2024 oqý jylynda 303 myń oqýshy 100 paıyz tegin oqýlyqtarmen jáne oqý-ádistemelik quraldarmen qamtamasyz etiledi. Qazirgi ýaqytta oqýlyqtardy satyp alý rásimderi júrip jatyr.

Avtory: Baqdáýlet Seraly