Almatyda mektep oqýshylary men stýdentter «OŃAI» jol júrý bıletin jaz mezgilinde de paıdalanýǵa múmkindik aldy
ALMATY. QazAqparat - Almatyda mektep oqýshylary men stýdentter «Ońaı» jol júrý bıletin jaz mezgilinde de paıdalanýǵa múmkindik aldy. Bul týraly búgin «OŃAI» elektrondyq bılettendirý júıesi operatorynyń baspasóz qyzmetinen habarlady.
Osylaısha, buǵan deıin habarlanǵanyndaı, bıylǵy jyly 1 shilde men 31 tamyz aralyǵynda oqýshylar men stýdentterge arnalǵan «Ońaı» jol júrý bıletiniń qoldanylmaıtyndyǵy týraly sheshim kúshin joıdy.
Almaty ákimdigi men «OŃAI» elektrondyq bılettendirý júıesi operatorynyń ózara kelisimi boıynsha, endi jaz aılarynda mektep oqýshylary men stýdentter «OŃAI» jol júrý bıletin paıdalana alady. Olardan basqa, jol aqysy boıynsha belgili bir jeńildikterge ıe azamattar da ózderiniń jeńildetilgen jol júrý kartochkasyn paıdalanýlaryna bolady.
Esterińizge sala ketelik, mektep oqýshylary men stýdentterge arnalǵan kólik kartasynyń baǵasy qalalyq qoǵamdyq kólikterdegi tarıftiń 50 paıyzyn quraıdy. Mundaı jeńildik jas mólsheri boıynsha zeınetkerlerge jáne 18 jasqa tolmaǵan tórt jáne odan da kóp balalary bar analarǵa da berilgen. Al Uly Otan soǵysynyń ardagerleri men múgedekteri, jasy 75-ten asqan zeınetkerler, Uly Otan soǵysy ardagerleri men múgedekterine teńestirilgen tulǵalar, birinshi, ekinshi toptaǵy múgedekter jáne jasy 18-ge tolmaǵan múgedek jandar qoǵamdyq kólikterde tegin júre alady.
