Almatyda mektep qurylysyna otandyq ónim qoldanylady

ALMATY. QazAqparat- Almatyda mektep qurylysyna jergilikti óndirýshiler tartylady. Bul – «Jaıly mektep» ulttyq jobasyn iske asyrý sheńberinde qolǵa alynǵan shara, dep habarlaıdy QazAqparat tilshisi.

Almaty qalasy ákiminiń orynbasary Álisher Ábdiqadyrovtyń sózinshe, mektepterdi jıhazben, qurylǵylarmen qazaqstandyq óndirýshiler jabdyqtaıdy. Qazir jobalyq qujattama ázirlenip jatyr, qurylys kúzde bastalady.

«Jaıly mektep» ulttyq jobasy aıasynda qalada 37,1 myń oqýshylyq oryndy 22 mekteptiń qurylysy josparlanýda. Mektepter salý boıynsha belgilengen tásilge sáıkes, olar negizinen otandyq óndiristiń taýarlarymen jaraqtandyrylady. Ákimdik óz tarapynan osy jobany iske asyrýda jergilikti óndirýshilerge barynsha qoldaý kórsetýge daıyn», - dedi qala ákiminiń orynbasary Álisher Ábdiqadyrov.

Búgingi kúni Almatydaǵy segiz mektep boıynsha qurylys salýshylarmen kelisimshart jasaldy. Jańa mektepter zamanaýı standarttardy, qajetti ınfraqurylymdy eskere otyryp salynady.

Aıta keterligi, sońǵy onjyldyqta Almaty qalasy boıynsha oqýshylar sany jyl saıyn halyqtyń tabıǵı ósýi men ishki kóshi-qon esebinen orta eseppen 12-14 myń balaǵa artýda.