Almatyda mektep bitirýshi 8 myńnan astam túlekke sońǵy qońyraý soǵyldy

Mektep qabyrǵasymen qoshtasyp, úlken ómirge qadam basyp jatqan túlekterdi quttyqtaý úshin qala ákimi Ahmetjan Esimov qaladaǵy O.Jandosov atyndaǵy №105 Halyqaralyq lıngvıstıkalyq mektepke bardy.

Qala ákimi búgingi túlekter elimizdi alǵa tartatyn jańa býyn ekendigin aıtyp ótti. «Bul bilimdi, zamanaýı oılaı biletin jastar. Búgingi kún olar úshin erekshe mánge ıe. Olardyń keıbiri joǵary oqý ornyna tapsyryp, oqýyn jalǵastyrady, al keıbiri ózderiniń eresek, eńbek ómirin bastaıdy», -dep atap ótti óz sózinde A.Esimov.

Sonymen qatar ol Almaty mektepteri el boıynsha eń úzdik ekendigin aıtyp ótti. «Ótken aptada biz «Úrker» qurmet belgisin tabystaý is-sharasyn ótkizdik. Sonda halyqaralyq jáne respýblıkalyq olımpıadalarda árqashan bizdiń qala mektepteriniń oqýshylary birinshi oryndy jeńip alyp otyrǵandyǵyn aıtqan edik. Elimizde júrgizilip otyrǵan saıasattyń arqasynda qalamyzdyń balalary jaqsy bilim alýǵa qol jetkizip otyr, sondyqtan ustazdardyń baǵa jetpes eńbegine alǵysymdy bildiremin. Túlekterge aıtarym, ata-analaryń men Elbasynyń jáne halyqtyń artyp otyrǵan úmitin aqtaýdy shyń júrekten tileımin», -dep qala ákimi óziniń ystyq lebizin bildirdi.