Almatyda megapolıstiń bes ózekti taqyrybyna arnalǵan beınerolıkterdiń tanystyrylymy bolyp ótti
Y. Qańtardyń 26-sy. QazAqparat /Názıra Eleýhan/ - Búgin Almaty qalasy ishki saıasat basqarmasynyń 2009 jylǵy memlekettik- áleýmettik tapsyrystary aıasynda «Este qalǵan galereıa» derekti fılminiń jáne Almaty týraly túsirilgen bes beınerolıktiń tusaýkeseri, ári tanystyrylymy bolyp ótti,
dep habarlaıdy QazAqparat.
Beınerolıkter megopolıstiń bes ózekti taqyrybyna arnalǵan. Birinshi beınerolık demografııa máselesine arnalyp, «Almaty - biz bolashaq qamyn oılaımyz» dep atalsa, ekinshi beınerolık qala mádenıetine arnalyp, «Almaty - elimizdiń rýhanı jáne mádenı ortalyǵy» degen atpen jaryq kórdi. Úshinshi beınerolık Almaty qalasynda ózekti taqyryptyń biri bolyp otyrǵan kólik keptelisi máselesine arnalyp «Almaty. Qala tynysyn keńeıtemiz» dep atalady. Tórtinshi beınerolık búgingi kúni Almaty qalasy úshin basty taqyryp bolyp otyrǵan 2011 jylǵy qysqy Azııa oıyndarynyń daıyndyǵyna arnalǵan. Ol beınerolık «Almaty - biz álemniń sporttyq jetistikterine kýá bolamyz» dep atalady. Sońǵy, besinshi rolık Qazaqtyń ál-Farabı atyndaǵy ulttyq ýnıversıtetine arnalyp «Almaty - Qazaqstannyń ǵylymı jáne tanymdyq ortalyǵy» dep atalady.
«Este qalǵan galereıa» derekti fılminde 1981 jyly alǵashqy ret Qazaq SSR-niń halyq ártisi Jamal Omarovanyń qurmetine qoıylǵan memorıaldy taqta tarıhynan bastap, el tarıhyna ózindik qoltańbasyn qaldyrǵan Dinmuhamed Qonaev, Muhtar Áýezov, Ǵabıt Músirepov, Qanysh Sátbaev, Qaltaı Muhametjanov syndy tulǵalarmen qatar, Almaty qalasynda turǵan barlyq óner men mádenıet qaıratkerleri, saıasatkerler men ǵalymdar jaıly sóz bolady. Fılm barysynda qalada qoıylǵan júzden asa memorıaldy taqtalardyń avtory Pavel Shorohov bul janrdyń damýy týraly oıymen bólisip, taqtalardyń tarıhy týraly syr shertedi.
«Biz tapsyrys alǵanda áli túsirilmegen taqyrypty kóterýge tyrysyp, bizdiń qala qandaı degen suraqqa jaýap izdedik. Sondyqtan memorıaldy taqtalar tarıhy týraly derekti fılm túsirdik. Bul osy taqyrypta túsirilgen birinshi derekti fılm bolyp sanalady. Al, beınerolıkterdi daıyndaý barysynda qalamyzdaǵy ózekti degen taqyryptardy kóterýge tyrystyq», dedi Almaty qalasynyń Úkimettik emes uıymdar konfederatsııasynyń prezıdenti Láılá Ahmetova. Onyń aıtýynsha, bul birinshi tapsyrys, ekinshi tapsyrys boıynsha bıylǵy jyldyń aqpan aıynda qazaq jáne orys tilinde, 250 bettik «Men turatyn qala» dep atalatyn Almatynyń eski jáne jańa fotolary engizilgen kitap jaryq kóredi.
