Almatyda megapolısti odan ári damytýǵa qatysty Úkimettiń kóshpeli májilis ótedi
ALMATY. 14 sáýir. QazAqparat - Almaty qalasynyń ákimi Ahmetjan Esimov keshe Premer-Mınıstrdiń qatysýymen ótken máslıhattyń kezekten tys sessııasynda mınıstrler keńsesiniń basshysyna megapolısti odan ári damytýǵa qatysty Úkimettiń kóshpeli májilisin ótkizýdi usyndy.
Óz sózinde ákim, Memleket basshysy men Úkimettiń qoldaýy arqasynda sońǵy 3 jyl ishinde Almatyda 13 myń úlesker máselesi sheshilgendigin atap ótti. Eger Úkimet 19,3 mıllıard teńgeni bóletin bolsa, onda bıyl qalǵan 3 200 úlesti qurylys máselesin tolyq sheshýge múmkindik týar edi. Sonymen qatar, 2011 jyly ıpoteka máselesi de sheshimin tabatyn bolady.
Almatynyń búgingi tańdaǵy basty basymdyqtarynyń biri - jańadan ashylǵan Alataý aýdanyn damytý. Ashylǵan kúnnen bastap munda jergilikti atqarý organdarynyń ǵımarattary, jańa mektepter, bala baqshalar, emhanalar, salyndy, 160 kóshe jasalyp, sý, gaz qubyrlary tartyldy. Búgingi tańda «qyzyl jıekten» asyp ketkender máselesin sheshý qolǵa alynyp otyr. Kópshiliktiń qoly jetetin turǵyn úıler salynýda. 4 myń 500 jerdi óz betimen basyp alýshylardyń 3 myńynyń máselesi sheshimin tapty. Qala ákimi jergilikti bıýdjet esebinen Tehnıkalyq-ekonomıkalyq negizdeme jasalǵandyǵyn, jańa aýdanda jelilerin júrgizý úshin qarjy bólingendigin aıtty. Ol sonymen qatar, qazaqstandyq jáne sheteldik kásipkerler men ınvestorlardyń jańa ındýstrııaldy aımaqta ınnovatsııalyq óndiristi damytýǵa nıet bildirip otyrǵandyqtaryn da jetkizdi.
«Bul jalpy qala ekonomıkasyn damytýdyń qýatty alańy bolar edi»,-dedi Ahmetjan Esimov.
Almaty ákimi Memleket basshysynyń halyqqa Joldaýy aıasynda júzege asyrylýy tıis turǵyn úı-kommýnaldyq sharýashylyq pen turǵyn úı sektoryn damytý máselesine de keńinen toqtaldy. «Biz jalpy quny 1,4 mıllıard teńge bolatyn ózimizdiń memlekettik turǵyn úı baǵdarlamamyzdy bastadyq. Bıyldyń ózinde 1 mıllıard 100 myń teńgesi ıgeriletin bolady, qalǵany keler jyly júzege asady», - dedi ákim.
Jol ınfraqurylymy nysandarynyń qurylysyn, shyǵys aınalma jolyn, metropolıtendi, iri «Ahsel Kent» móltekaýdany mańynda jol aıryǵyn, Alataý aýdany Rysqulov dańǵylynyń boıynda túrli nsandardy salý úshin qosymsha 60 mıllıard teńge qajet. A. Esimov bul jobalardyń barlyǵy Almatynyń ekologııasyn jaqsartý úshin mańyzdy ekendigin atap ótti.
«Almaty-tek demalatyn ǵana qala emes. Bul eńbekshiler qalasy jáne ol memleketke paıda keltirýde. Respýblıkadaǵy salyq túsiminiń 29,4 paıyz úlesin Almaty berýde. Memleket basshysy men Úkimettiń qoldaýy arqasynda bizdiń qalamyzdy odan ári damytyp, gúldendirýge, ekologııalyq taza qalaǵa aınaldyrýǵa tolyq múmkindik bar»,-dep qorytyndylady óz sózin Ahmetjan Esimov.
Mınıstrler Keńsesiniń basshysy óz kezeginde kóterilgen máselelerdiń rasynda da naqtyly sheshimderin tabýy tıistigin, óıtkeni Almaty eń iri kommertsııalyq qala ekendigin ári Qazaqstan úshin erekshe rol atqaratyndyǵyn atap ótti. Kárim Másimov megapolıstiń odan ári damýyna qatysty máselelerdi sheshý úshin Almaty qalasynda Úkimettiń kóshpeli májilisin ótkizýdi tapsyrdy. Kóshpeli májilis ústimizdegi jyldyń mamyr aıynda ótedi dep belgilendi.
